Ásta ráðin for­stjóri Festi

Þetta kemur fram í tilkynningu frá Festi. Áður en Ásta tók við starfi framkvæmdastjóra Krónunnar var hún framkvæmdastjóri Viðskiptaráðs Íslands frá árinu 2017.

„Fyrir ráðgjafafyrirtækið McKinsey & Company frá árinu 2012, bæði á skrifstofum þess í Tókýó og Kaupmannahöfn, þar sem hún tók þátt í eða leiddi fjölda smærri og stærri greininga- og umbreytingaverkefni. Áður starfaði hún hjá IBM í Danmörku og stoðtækjaframleiðandanum Össuri hf., bæði í Frakklandi og á Íslandi. Ásta Sigríður er vélaverkfræðingur með M.Sc. gráðu frá DTU, Tækniháskólanum í Danmörku,“ segir í tilkynningunni.

Spennandi tímar og sóknartækifæri

Þá er haft eftir Guðjóni Reynissyni, stjórnarformanni Festi, að mikill styrkur sé að fá Ástu til félagsins.

„Framundan eru spennandi tímar og mikil sóknartækifæri. Ásta hefur bæði reynslu af rekstri í smásölugeiranum eftir árin hjá Krónunni en jafnframt alþjóðlega reynslu í stefnmótun og umbótaverkefnum fyrir stórfyrirtæki í öðrum geirum. Við erum stolt af því að fá jafn öfluga konu til að leiða fyrirtækið,“ er haft eftir Guðjóni.

Þá er haft eftir Ástu að hún sé þakklát fyrir traustið, enda starfi rekstrarfélög Festi á spennandi og síkvikum mörkuðum, sem hafi raunveruleg áhrif á lífskjör íslensk almennings.

„Ábyrgð okkar sem þar störfum er því mikil og ljóst að vegferð félagsins þarf að vera í stöðugri þróun. Það eru forréttindi að fá að vinna áfram með öllu því öfluga fólki, sem starfar innan Festi og rekstrarfélaganna,“ er haft eftir Ástu.

Rekstrarfélög Festi eru N1 ehf., ELKO ehf., Krónan ehf., Festi fasteignir ehf., Bakkinn vöruhótel ehf. og N1 Rafmagn ehf. Í lok síðasta mánaðar var greint frá því að Ásta hefði keypt tæplega 20 milljóna króna hlut í Festi, og greitt 208 krónur á hlut.

Ný stjórn tók við í sumar

Í júní tilkynnti Festi að Eggert Þór Kristófersson, þáverandi forstjóri, hefði sagt starfi sínu lausu. Síðar var greint frá því að stjórn félagsins hefði haft frumkvæði að starfslokum Eggerts.

Í kjölfarið kölluðu hluthafar eftir hluthafafundi, vegna óánægju með starfslok hans. Ný stjórn var kjörin á fundinum, þar sem tveir stjórnarmenn héldu sætum sínum en þrír nýir voru kjörnir inn.