Þrjú mismunandi hjartalyf í sýni hinnar fimmtán ára gömlu Kamilu

Það er óhætt að segja að skautasamfélagið logi eftir að hin rússneska Kamila Valijeva fékk að keppa á Vetrarólympíuleikunum þrátt fyrir að hafa fallið á lyfjaprófi í desember.

Kamila er í efsta sætinu eftir skylduæfingarnar en úrslitin ráðast eftir keppni í frjálsum æfingum á morgun. Það var vissulega magnað að þessi fimmtán ára stelpa skildi standast pressuna og álagið sem hefur verið á henni síðustu daga og klára æfingu sína jafnvel og hún gerði.

Það breytir því ekki að mjög margir eru ósáttir við það að keppandi sem er nýfallinn á lyfjaprófi fái að taka þátt í Ólympíuleikum. Þetta hefur verið gagnrýnt bæði af sérfræðingum, þjálfurum og öðrum keppendum.

Niðurstöðurnar úr umræddu lyfjaprófi bárust ekki fyrr en Kamila var byrjuð að keppa og búin að hjálpa Rússum að vinna eitt gull í liðakeppninni. Rússar segjast ekkert hafa vitað um niðurstöðuna fyrr en svo löngu eftir að prófið var tekið sem var í lok desember.

Alþjóðaíþróttadómstóllinn leyfði Kamilu að keppa en þetta mál er langt frá því að vera búið. Staðan sem er kominn upp þýðir að engin verðlaun verða afhent ef Kamila er á verðlaunapalli. Þau voru ekki afhent í liðakeppninni og þannig verður einnig í einstaklingskeppninni tryggi hún sér verðlaun.

Nýjustu fréttirnar eru grein hjá New York Times um frekari niðurstöður úr lyfjaprófi Kamilu.

Það fundist nefnilega þrjú mismunandi hjartalyf í sýni hennar. Auk Trimetazidine sem varð til þess að hún féll á prófinu voru einnig leyfar af hjartalyfjunum hypoxen og L-Carnatine í sýni hennar en þau eru ekki á bannlista. Aðalgróði hennar að nota slík lyf væri að auka úthald, minnka þreytu og hjálpa henni með betri súrefnisinntöku.

Vörn Kamilu snýst meðal annars um það að afi hennar þurfi að taka inn hjartalyf og að hún hafi fengið þessi efni í sig eftir að hafa drukkuð úr sama glasi og hann.

Ein af aðalástæðunum fyrir því að Alþjóðaíþróttadómstóllinn leyfði Kamilu að keppa er að hún er undir sextán ára aldri og því ekki lögráða. Sá úrskurður er samt ekki lokaúrskurður og snerist aðallega um það hvort hún færi í tímabundið bann eða ekki.