Hin fimmtán ára Kamila kennir afa sínum um fallið á lyfjaprófinu

Kamila fær vissulega að keppa á leikunum en það tryggir þó ekki að hún gæti verið svipt verðlaunum sínum seinna þegar málið hefur farið alla sína leið í kerfinu. Hún er því ekki laus eftir fallið á lyfjaprófi í desembermánuði þar sem hún mældist með bannað, árangursaukandi hjartalyf að nafni trimetzadin.

Denis Oswald, sem er í aganefnd Alþjóðaólympíunefndarinnar, hefur sagt frá því að Kamila kenni hjartameðali afa síns um að trimetzadin hafi mælst í sýni hennar. Hún á að hafa drukkið úr glasi sem afi hennar hafi notað til að taka hjartalyfið sitt.

„Hluti af vörn hennar er að sýni hennar hafi verið mengað vegna hjartalyfs sem afi hennar tók,“ sagði Denis Oswald í samtali við AP fréttastofuna. Oswald hefur unnið sem íþróttalögmaður og þekkir vel til. Hann segir að lögmenn Kamilu hafi nefnt fjölda atriða sem veki upp vafa um sekt skautakonunnar ungu.

Kamila er frábær skautakona og flestir búast við því að hún vinni gullið í einstaklingskeppninni enda að bjóða upp á erfiðari stökk en hafa sést áður á leikunum. Það er hins vegar búið að vera mikið andlegt álag á þessar ungu stelpu eftir allt fárið síðustu daga og það mun eflaust taka sinn toll.

CAS, Alþjóðaíþróttadómstóllinn, hlustaði ekki á Alþjóðaólympíunefndina, Alþjóðalyfjaeftirlitið eða Alþjóðaskautasambandið sem áfrýjuðu ákvörðun rússneska lyfjaeftirlitsins um að aflétta banni Valievu.

Í rökstuðningi CAS sagði að taka þyrfti tillit til þess að Valieva væri aðeins fimmtán ára gömul, það væri ekki hennar sök að niðurstöður lyfjaprófa væru lengi að skila sér, og að það gæti valdið henni óafturkræfum skaða að fá ekki að keppa á Ólympíuleikunum.

Kamila og félagar unnu liðakeppnina í listhlaupi á skautum en fengu ekki verðlaunin afhent og það verða heldur ekki nein verðlaun afhent verði Kamila ein af þeim þremur efstu í einstaklingskeppninni. Alþjóðaólympíunefndin ætlar ekki að afhenda nein verðlaun sem gæti þurft að taka til baka verði niðurstaðan sú að Kamila verði dæmd í bann.