Hæsti­réttur hafnar því að ó­gilda atkvæði í Penn­syl­vaníu

Málssóknin sem Hæstiréttur vísaði frá var lögð fram af Mike Kelly, þingmanni Repúblikanaflokksins í fulltrúadeild, og er liður í tilraunum Donalds Trump fráfarandi forseta og stuðningsmanna hans til þess að tryggja Trump áframhaldandi setu í Hvíta húsinu.

Sneri málsóknin að því að ríkislög í Pennsylvaníu, sem sett voru 2019 og heimiluðu póstsendingu atkvæða, væru andstæð stjórnarskrá. Því bæri að sleppa því að telja atkvæði sem send höfðu verið með pósti. Hæstiréttur hafnaði því hins vegar, að því er virðist samróma. Þrír af níu dómurum við réttinn voru skipaðir af Trump.

Kelly höfðaði málið ásamt fleirum þann 21. nóvember síðastliðinn og fór fram á að Pennsylvaníuríki myndi annað hvort ógilda þær 2,5 milljónir atkvæða sem bárust með pósti, eða að löggjafarþing ríkisins, þar sem Repúblikanar eru í meirihluta, fengi að velja þá kjörmenn sem að lokum greiða forsetaframbjóðanda atkvæði sitt síðar í þessum mánuði.

Hæstiréttur Pennsylvaníu hafði áður vísað málinu frá, á þeim forsendum að Repúblikanaflokkurinn hefði dregið það um of að fara með stjórnskipulegt gildi laganna fyrir dóm. 

Lögmenn Toms Wolf, ríkisstjóra Pennsylvaníu, í málinu, segja að fullyrðingar Kellys um að lögin séu andstæð stjórnarskrá séu algerlega úr lausu lofti gripnar.

„Eftir að hafa beðið í meira en eitt ár með að láta reyna á gildi [laganna], og að hafa reynt að nota reglur réttarkerfisins sér í hag í leiðinni, koma þeir [Repúblikanar] fyrir dóminn með óhreinar hendur og fara fram á að heilt ríki verði útilokað [frá kosningunum],“ sögðu lögmennirnir meðal annars í skriflegum forsendum til Hæstaréttar.

Trump batt vonir við Hæstarétt

Niðurstaða Hæstaréttar í málinu er talin mikið reiðarslag fyrir  Trump í þeirri vegferð sem hann hefur verið á frá því úrslit kosninganna urðu ljós. Hann hefur ítrekað haft uppi stoðlausar fullyrðingar um að brögð hafi verið í tafli og að hann hefði unnið kosningarnar, ef ekki hefði verið fyrir víðtækt kosningasvindl sem hann hefur ekki fært neinar sönnur fyrir.

Á stuðningsmannafundi sem fráfarandi forsetinn hélt síðastliðinn laugardag í Georgíuríki hélt forsetinn uppteknum hætti. Sagði hann meðal annar að kosningarnar hafi verið uppfullar af „svikum, prettum og blekkingum.“

„Vonandi mun löggjafarvaldið og Hæstiréttur Bandaríkjanna stíga fram og bjarga landinu okkar,“ sagði Trump fyrir framan skara stuðningsmanna sinna á laugardag. Var þetta ekki í fyrsta sinn sem Trump hafði orð á því að Hæstiréttur myndi taka til greina ásakanir hans um kosningasvik, eða aðrar tilraunir til að fá úrslitunum kosninganna snúið sér í hag.

Í ræðu sem hann hélt í síðustu viku setti hann fram svipuð sjónarmið, þegar hann sagðist vona að dómstólar „og sérstaklega Hæstiréttur“ myndu sjá að kosningarnar hefðu verið „algjört klúður“ og þeir myndu gera það sem væri „rétt fyrir landið.“

Kjörmenn koma senn saman

Minna en vika er þangað til kjörmenn hvers ríkis koma saman og greiða frambjóðendum formlega þau kjörmannaatkvæði sem þeir tryggðu sér í kosningunum, en það gerist næstkomandi mánudag, 14. nóvember.

Biden tryggði sér 306 kjörmenn, en Trump 238. Er það sami munur og var þegar Trump bar sigurorð af Demókratanum Hillary Clinton í forsetakosningunum 2016.

Trump sagði hins vegar á fréttamannafundi í lok síðasta mánaðar að hann muni una niðurstöðunni, fari svo að fleiri kjörmenn greiði Biden atkvæði sitt. Fullyrðingar um svik og svindl voru þó ekki langt undan.

„Það verður mjög erfitt að viðurkenna ósigur því við vitum að það var víðtækt kosningasvindl,“ sagði Trump.