ÍAV hlut­skarpast í út­boði banda­rískra yfir­valda

Verktakafyrirtækið ÍAV gerði tilboð upp á 5,3 milljarða íslenskra króna í verkefni sem bandaríska varnarmálaráðuneytið bauð út í tengslum við hönnun og framkvæmdir vegna flughlaða og tengdra verkefna á öryggissvæðinu í Keflavík. Tilboð ÍAV var um það bil 2,5 milljörðum lægra en kostnaðaráætlun gerði ráð fyrir.

Heildarfjárheimild bandaríska þingsins gerði ráð fyrir 57 milljónum Bandaríkjadala í verkefnið, eða um 7,8 milljörðum á núverandi gengi, en tilboð ÍAV hljóðaði upp á 39 milljónir Bandaríkjadala. Útboðið var auglýst í júlí á síðasta ári en bandarísk yfirvöld fjármagna framkvæmdirnar alfarið.

Bæði íslensk og bandarísk fyrirtæki buðu í verkið, en um þrjú verkefni er að ræða. Í fyrsta lagi hönnun og verkframkvæmdir við stækkun á flughlaði innan öryggissvæðisins á Keflavíkurflugvelli. Í öðru lagi hönnun og verkframkvæmdir fyrir færanlegar gistieiningar. Í þriðja lagi hönnun og verkframkvæmdir vegna færslu á flughlaði fyrir hættulegan farm.

Áætluð verklok eru í febrúar 2023.

„Auk ofangreindra framkvæmda standa nú yfir eða eru í undirbúningi framkvæmdir sem hafa verið samþykktar á öryggissvæðinu. Þar má nefna breytingar og endurbætur á flugskýli 831, byggingu þvottastöðvar fyrir flugvélar og viðhald og endurbætur á flughlöðum, akstursbrautum og ljósakerfum,“ segir í tilkynningu um verkefnið á vef Stjórnarráðsins.