„Þetta nafn kom upp þegar ég var búin að vera ó­létt í mánuð og yfir­gaf okkur aldrei“

Annie Mist Þórisdóttir Crossfit-kempa eignaðist sitt fyrsta barn á dögunum með unnusta sínum Frederik Ægidius og nú hefur barnið fengið nafn.

Sú litla hefur verið nefnd Freyja Mist Ægidius Frederiksdóttir en Annie Mist greindi frá þessu á Instagram-síðu sinni nú um helgina.

„Hefðin á Íslandi er að skýra barnið sitt þremur til sex vikum eftir að það fæðist eða þegar þú hefur fengið smá tíma til þess að prófa nafnið og taka lokaákvörðun,“ skrifaði Annie.

„Við höfum farið fram og aftur og prufað fullt af mismunandi nöfnum en þetta nafn kom þegar ég var búin að vera ólétt í mánuð og fór aldrei úr huga okkar. Hún er Freyja.“

Annie Mist verður ekki meðal keppenda á heimsleikunum í ár enda nýbökuð móðir. Hún hefur í tvígang staðið uppi sem heimsmeistari og var sú fyrsta til að hljóta titilinn hraustasta kona í heimi.