Nýr tölvuvæddur brjóstahaldari á meðal þess sem konurnar fá á heimsleikunum í CrossFit: Þetta er í kassa keppenda

Keppendurnir á heimsleikunum í CrossFit fengu ýmislegt gefins þegar þau mættu til leiks í Madison í vikunni.

Heimsleikarnir í CrossFit hefjast á morgun en keppendur þurfa fyrst að skrá sig inn hjá mótshöldurum.

Um leið og keppendurnir gera þá fá þeir ýmislegt gefins frá Reebok íþróttavöruframleiðandanum sem er samstarfsaðili CrossFit samtakanna.

Allir keppendur verða að keppa í fötunum frá Reebok en það eru reglur hjá CrossFit og hafa verið lengi.

Hér fyrir neðan má sjá myndband þar sem Tommy Marquez frá Youtube-síðunni Morning Chalk Up fékk kynningu á því hvað keppendur heimsleikanna fá gefins í ár.

Hver og einn keppandi fær meðal annars fjóra mismunandi skó sem henta við mismunandi aðstæður. Þar eru léttir skór, hlaupaskór, lyftingaskór og takkaskór þegar keppendur þurfa gott grip.

Hver keppandi færi síðan fötin sín í sérstökum kassa þar sem má finna öll möguleg keppnisföt.

Keppendur fá sem dæmi sérstakan jakka sem er vel merktur þeim og þeirra þjóð en honum klæðast þeir á opnunarhátíðinni.

Í kassanum í ár má líka finna nýjan tölvuvæddan brjóstahaldara fyrir konurnar sem keppa á heimsleikunum.

Þessi nýi brjóstahaldari frá Reebok sem er meðal annars kynntur í fyrrnefndu myndbandi.

Þessi brjóstahaldari er með sérstakan nema í sér sem nemur hversu mikið íþróttakonan er að hreyfa sig hverju sinni. Ef íþróttakonan hreyfir sig mikið þá verður brjóstahaldarinn stífari og veitir þannig meiri stuðning. Þennan brjóstahaldara og hin fötin sem þau fá má sjá í myndbandinu hér fyrir neðan.

Heimsleikarnir í CrossFit verða í beinni útsendingu á Vísi og Stöð 2 Sport 3.