Gagn­rýnir þjóðar­leið­toga fyrir að­gerða­leysi vegna stríðs­glæpa

Meira en hundrað saklausir borgarar, þar á meðal 26 börn, hafa látið lífið í loftárásum Sýrlandshers og Rússa á sjúkrahús, skóla, markaði og bakarí í sýrlensku borginni Idlib á síðustu tíu dögum. Þetta er haft eftir Michelle Bachelet mannréttindastjóra Sameinuðu þjóðanna á fréttavef BBC.

Bachelet segir að það sé ólíklegt að skotmörkin hafi verið tilviljanakennd eða slys. Hún segir að þrátt fyrir að meira en hundrað manns hafi týnt ífi í þessum loftárásum hafi málið ekki vakið nein teljandi alþjóðleg viðbrögð.

Hún gagnrýnir að leiðtogar öflugustu þjóðríkja á jörðinni hafi ekkert aðhafst vegna málsins og að öryggisráð Sameinuðu þjóðanna sé lamað og óstarfhæft. Bachelet segir að þeir sem beri ábyrgð á þessum loftárásum verði mögulega sóttir til saka fyrir stríðsglæpi í fyllingu tímans.

Idlib er í norðvesturhluta Sýrlands, 59 kílómetra suðvestur af borginni Aleppó sem er nær gjöreyðilögð eftir borgarastríð sem hófst í mars 2011.