Repúblikanar hafna lykilniðurstöðu leyniþjónustunnar og ljúka rannsókn

Engar vísbendingar eru um að forsetaframboð Donalds Trump hafi átt í samráði við rússnesk stjórnvöld fyrir forsetakosningarnar árið 2016, að mati flokkssystkina forsetans í leyniþjónustunefnd fulltrúadeildar Bandaríkjaþings. Niðurstaða repúblikana um að Rússar hafi ekki reynt að hjálpa Trump er þvert á álit leyniþjónustustofnana Bandaríkjanna.

Leyniþjónustunefnd fulltrúadeildarinnar er ein nokkurra þingnefnd sem hafa rannsakað afskipti Rússa af forsetakosningunum. Auk þeirra rannsakar Robert Mueller, sérstakur rannsakandi dómsmálaráðuneytisins, mögulegt samráð Trump og Rússa og hvort að forsetinn hafi reynt að hindra framgang rannsóknarinnar.

Repúblikanar, sem eru í meirihluta í leyniþjónustunefndinni, tilkynntu í gær að nefndin hefði lokið upplýsingaöflun sinni. Þeir hafa samið 150 blaðsíðna drög að lokaskýrslu sem verður að líkindum ekki gerð opinber fyrr en eftir nokkra mánuði. Í skýrsludrögunum er ekki vikið að neinum sjónarmiðum fulltrúa demókrata í nefndinni.

Trump forseti var fljótur að stökkva á skýrsludrögin í gær og tísti um að „ítarleg rannsókn hefði ekki fundið neinar vísbendingar um samráð“ við Rússa, allt í hástöfum.

Leyniþjónustan stendur við álit sitt

Það versta sem repúblikanar í nefndinni fundu voru möguleg dæmi um „lélega dómgreind, óviðeigandi fundi, óviðeigandi dómgreind að fallast á fundi“ að sögn Michaels Conaway, þingmanns repúblikana sem hefur umsjón með Rússarannsókn nefndarinnar, að því er segir í umfjöllun Washington Post.

Eitt dæmið er fundur sonar og tengdasonar Trump auk þáverandi kosningastjóra hans með Rússum sem höfðu lofað þeim skaðlegum upplýsingum um Hillary Clinton í júní árið 2016.

„En aðeins Tom Clancy eða Vince Flynn eða einhver þannig gæti tekið þessa röð óviljandi samskipta hver við annan, funda, eða hvað sem er og vafið hana inn í einhvers konar skáldsögu, æsispennandi njósnaspennutrylli,“ segir Conaway og vísaði þar til þekktra spennusagnahöfunda.

Þrátt fyrir að Conway taki undir að Rússar hafi reynt að hafa áhrif á niðurstöður forsetakosninganna segir hann repúblikana ósammála niðurstöðu leyniþjónustustofnana Bandaríkjanna um að markmið Rússa hafi verið að hjálpa Trump.

Allar leyniþjónustustofnanirnar lýstu því yfir þegar í janúar í fyrra að Rússar hafi reynt að hafa áhrif á niðurstöður forsetakosninganna til þess að hjálpa Trump. Vladimír Pútín, forseti Rússlands, hafi sjálfur gefið skipanir um aðgerðirnar.

Talsmaður skrifstofu yfirmanns leyniþjónustumála í Bandaríkjanna segir stofnanirnar standa við álit sitt og að þær muni fara yfir niðurstöður þingnefndarinnar, að því er segir í frétt New York Times.

Ætla að rannsaka FBI og dómsmálaráðuneytið

Demókratar deila hart á vinnubrögð repúblikana við rannsókn nefndarinnar og ákvörðunina um að ljúka henni. Þeir segja að repúblikanar í nefndinni hafi neitað að kalla til fjölda mikilvægra vitna eða krefjast gagna með því að gefa út stefnur. Repúblikanar segja á móti að þeir telji að stefnur hefðu ekki borið árangur.

Adam Schiff, oddviti demókrata í leyniþjónustunefndinni, sakar repúblikana um að ganga erinda flokks síns og Trump forseta með niðurstöðum sínum.

„Með því að ljúka eftirlitshlutverki sínu í einu opinberu rannsókninni í fulltrúadeildinni hefur meirihlutinn sett hagsmuni þess að verja forsetinn fram yfir að verja landið. Sagan mun dæma gjörðir þeirra harkalega,“ sagði Schiff í yfirlýsingu í gær.

Þrátt fyrir að rannsókn nefndarinnar á afskiptum Rússa af kosningunum ljúki nú segjast repúblikanar ætla að halda áfram að rannsaka hvort að alríkislögreglan FBI og dómsmálaráðuneytið hafi fengið heimild til að hlera fyrrverandi ráðgjafa forsetaframboðs Trump með óheiðarlegum hætti.

Ásakanir um slíkt voru settar fram í umdeildu minnisblaði sem Devin Nunes, formaður leyniþjónustunefndarinnar úr röðum repúblikana, lét taka saman. Trump forseti ákvað að gera minnisblaðið opinbert þrátt fyrir andmæli FBI og ráðuneytisins sem drógu trúverðugleika þess verulega í efa. Dómsmálaráðuneytið sagði það meðal annars „gríðarlega glannalegt“ að birta minnisblaðið.

Demókratar fengu að birta eigin minnisblað nokkrum vikum síðar þar sem þeir vefengdu grundvöll ásakanana repúblikana.