Vonar bara og biður að guð verndi börnin sín

„Ég vona bara að guð verndi þau. Það er það eina sem ég bið um,“ sagði hinn 73 ára gamli Pakistani Mohammad Fadhl Akram við fréttastofu AFP í gær. Akram og eiginkona hans, Saghran Bibi, urðu í gær fyrstu almennu borgararnir sem náðu að flýja Austur-Ghouta frá því þung árásahrina bandamanna Bashars al-Assad Sýrlandsforseta hófst fyrir næstum tveimur vikum. Hjónin þurftu að skilja eftir fimm börn sín og tólf barnabörn.

Akram og Bibi flúðu í daglegu fimm klukkustunda hléi á átökunum sem Rússar hafa fyrirskipað. Var ákvörðunin um daglegt hlé tekin til að leyfa fólki að flýja og hjálparsamtökum að koma inn í Austur-­Ghouta þar sem neyðin er mikil. Hléin verða áfram á hverjum degi, líklegast þangað til ályktun Öryggisráðs Sameinuðu þjóðanna um þrjátíu daga vopnahlé verður innleidd.

Hjónin voru fyrst til að flýja þrátt fyrir að um þriðja hléið væri að ræða. Bæði Rússar og Sýrlandsstjórn hafa áður sagt það vera vegna þess að uppreisnarmenn komi í veg fyrir að fólk flýi með því að varpa sprengjum og skjóta á skipulagða flóttaleið almennra borgara. Vlad­imir Zolotukhin hershöfðingi sagði við blaðamenn í gær að fjöldi almennra borgara hefði beðið um aðstoð við að flýja.

Uppreisnarmenn hafna þessum ásökunum hins vegar alfarið. Þeir saka Rússa og Sýrlendinga á móti um að hætta ekki árásum sínum í hléunum. Undir það hafa eftirlitssamtök á svæðinu tekið, meðal annars hin bresku Syrian Observatory for Human Rights.

Sameinuðu þjóðirnar létu vel í sér heyra í gær og eru erindrekar og stjórnendur þeirra ósáttir við aðgerðir Rússa, uppreisnarmanna og Assad-liða. Staffan de Mistura, erindreki SÞ í Sýrlandi, ítrekaði í gær þá bón SÞ að stríðandi fylkingar innleiddu þegar í stað vopnahlés­ályktun Öryggisráðsins.

„Við munum halda áfram að biðja þangað til við verðum rauð í framan, jafnvel blá. Við biðjum báðar fylkingar um að hætta að sprengja landsvæði hvor annarrar og um að hleypa bílalestum hjálparsamtaka inn í Austur-Ghouta.“

Jan Egeland, sérstakur ráðgjafi de Mistura, sagði í gær frá því að hann hefði sent fulltrúum þeirra þjóða sem sitja í sérstakri nefnd SÞ um ástandið í Sýrlandi „óvenju harðort“ bréf. „Ykkur er að mistakast alfarið að hjálpa okkur að hjálpa almennum borgurum í Sýrlandi,“ sagði Egeland. Lýsti hann ástandinu í Austur-Ghouta á þann hátt að þar væri engin virðing borin fyrir alþjóðalögum.

Egeland sagði nauðsynlegt að nokkrar bílalestir fengju að fara inn í Austur-Ghouta í hverri viku og að um þúsund þyrftu bráðnauðsynlega aðstoð við að komast út af svæðinu vegna sára sinna. Sagði hann nauðsynlegt að bæði stjórnarliðar og uppreisnarmenn aðstoðuðu hjálparsamtök og almenna borgara.

„Ég verð bara að segja það að ég veit ekki um ein einustu hjálparsamtök sem telja fimm klukkustundir nægan tíma til að aðstoða almenna borgara í Austur-Ghouta og flytja hina særðu á brott,“ sagði Egeland enn fremur.