Al-Qaeda í Sýrlandi lýsir yfir ábyrgð á árásunum í Damaskus

Sýrlenskur öfgahópur á snærum hryðjuverkahópsins al-Queda hefur lýst ábyrgð á sprengjuárásum sem urðu að minnsta kosti fjörutíu manns að bana í Damaskus á föstudaginn. BBC greinir frá.

Öfgahópurinn sem um ræðir heitir Hayat Tahrir al-Sham, gjarnan kallaður al-Queda í Sýrlandi. Hópurinn samanstendur af herskáum súnní-múslímum en samkvæmt BBC eru skotmörk hópsins oft og tíðum vinsælir áfangastaðir shía-múslima.

Um tvær sprengjuárásir var að ræða en tíu mínútur liðu á milli þeirra. Önnur árásin var á rútustöð en hin í Saghir-kirkjugarðinum sem staðsettur er í elsta hluta borgarinnar. Síðarnefndi áfangastaðurinn er vinsæll meðal írakskra pílagríma en þeir voru í meirihluta þeirra sem féllu í voðaverkunum.

Auk hinna fjörutíu sem létust eru að minnsta kosti 120 særðir. Samkvæmt mannréttindasamtökunum Observatory for Human Rights kann að vera að tala látinna sé ívið hærri, eða nálægt sjötíu manns.