Jimenez tryggði Benfica stig í Kasakstan

Astana og Benfica skildu jöfn, 2-2, í fyrsta leik dagsins í Meistaradeild Evrópu.

Liðin eru í C-riðli ásamt Atletico Madrid og Galatasary. Benfica vermir toppsæti riðilsins en portúgölsku meistararnir hafa náð í 10 stig í fyrstu fimm leikjum sínum. Vinni Galatasary ekki Atletico Madrid í kvöld er Benfica öruggt áfram í 16-liða úrslit Meistaradeildarinnar.

Astana er með þrjú stig á botni riðilsins en Kasakarnir hafa ekki enn unnið leik í riðlakeppninni í ár og eiga ekki lengur möguleika á að komast í 16-liða úrslitin.

Þeir voru þó nálægt því í dag en Astana komst í 2-0 eftir rúmlega hálftíma leik. Patrick Twumasi og Marin Anicic skoruðu mörkin.

Benfica minnkaði muninn fyrir hálfleik með marki Raúl Jimenez og hann tryggði Portúgölunum stig þegar hann jafnaði metin á 72. mínútu.

Benfica tekur á móti Atletico Madrid í lokaumferðinni á meðan Astana sækir Galatasary heim.