Þjálfari PSV: Við erum ekki hræddir við Manchester United

Phillip Cocu, þjálfari Hollandsmeistara PSV Eindhoven, er ekkert smeykur fyrir leik sinna manna gegn Manchester United í Meistaradeildinni annað kvöld.

Hollandsmeistararnir fá Louis van Gaal og lærisveina hans í heimsókn í fyrstu leikviku Meistaradeildarinnar, en þar snýr Memphis Depay aftur á sinn gamla heimavöll, aðeins nokkrum mánuðum eftir að hann yfirgaf liðið.

„Við eigum að virða alla andstæðinga okkar,“ sagði Cocu á blaðamannafundi í dag, en með United og PSV í riðlinum eru CSKA Moskva og Wolfsburg.

„Við erum samt ekki hræddir við Manchester United. Við ætlum ekkert að kasta inn handklæðinu áður en leikurinn byrjar. Þvert á móti ætlum við að nýta þetta tækifæri,“ sagði hann.

„Þetta eru leikirnir sem allir hlakka til. Það sama átti við um mig þegar ég var að spila. Við þurfum kannski frekar að róa leikmenn fyrir þenn leik heldur en að hvetja þá áfram. Það er mikilvægt að allir verði rólegir. Menn verða að einbeita sér því smáatriðin munu skipta máli í þessum leik,“ sagði Phillip Cocu.