Tveir öflugir PSG-leikmenn missa af Barcelona-leiknum

Franska liðið Paris Saint-Germain verður ekki með fullt lið á móti spænska stórliðinu Barcelona í átta liða úrslitum Meistaradeildarinnar.

Paris Saint-Germain og Barcelona mætast í fyrri leik sínum í átta liða úrslitunum á Parc des Princes í París í næstu viku.

Varnarmaðurinn David Luiz og miðjumaðurinn Thiago Motta verða hvorugur með í þessum mikilvæga leik. Þeir meiddust báðir aftan í læri en mismikið þó.

David Luiz er frá í fjórar vikur og Thiago Motta í tíu daga en þeir meiddust báðir í deildarleik á móti Marseille um helgina.

David Luiz missir því ekki aðeins af fyrri leiknum því meiðsli brasilíska miðvarðarins eru það alvarleg. Hann reif vöðva aftan í læri en það var aðeins tognun hjá Thiago Motta.

David Luiz skoraði eitt marka Paris Saint-Germain þegar liðið sló út hans gömlu félaga í Chelsea í sextán liða úrslitunum og átti mikinn þátt í að koma PSG svo langt í keppninni.