Zlatan: Leikmenn Chelsea voru eins og smábörn | Myndband

Zlatan Ibrahimovic átti lítinn þátt í magnaðri frammistöðu Frakklandsmeistara Paris Saint-Germain þegar þeir komust í átta liða úrslit Meistaradeildarinnar í gærkvöldi.

Svíinn var rekinn af velli eftir 30 mínútur í leik PSG og Chelsea, en dómurinn var þó kolrangur hjá hollenska dómaranum Björn Kuipers sem átti ekki góðan dag.

Sjá einnig:Tíu menn PSG slógu Chelsea út í framlengingu | Sjáið mörkin og rauða spjaldið

Zlatan fór í tæklingu á móti Oscar og til að tryggja hann fengi refsingu fyrir brotið umkringdu níu leikmenn Chelsea-liðsins dómarann sem var nokkuð fljótur að rífa upp rauða spjaldið.

„Ég veit ekki hvort ég eigi að vera reiður eða byrja að hlægja. Ég hugsaði bara að þessi maður veit ekki hvað hann er að gera þegar ég sá rauða spjaldið,“ sagði Zlatan eftir leikinn í gær.

„Það var samt ekki það versta. Það versta er að þegar ég fékk rauða spjaldið voru allir Chelsea-leikmennirnir þarna. Mér leið eins og það væri hópur smábarna í kringum mig,“ sagði Zlatan Ibrahimovic.

Zlatan var vitaskuld ánægður með samherja sína sem komu tvisvar til baka í leiknum eftir að lenda undir þrátt fyrir að vera manni færri í 90 mínútur.

„Þetta var ótrúleg frammistaða í ljósi þess að við vorum manni færri. Strákarnir spiluðu með hjartanu. Þetta var ekki auðvelt með tíu menn inn á en við sýndum gæði og hjarta,“ sagði Zlatan Ibrahimovic.

Rauða spjaldið: