Messi sendur í ítarlegri lyfjapróf en félagar hans

Lionel Messi, stórstjarna Barcelona, var ekki alveg nógu sáttur við lyfjaprófið sem hann þurfti að gangast undir í gær.

Spænskir lyfjaeftirlitsmenn mættu á æfingasvæði Barcelona í gær til þess að taka hefðbundið próf fyrir Meistaradeildarleik liðsins gegn PSG á morgun.

Messi, Andres Iniesta, Ivan Rakitic, Claudio Bravo og Jordi Alba voru teknir fyrir að þessu sinni.

Það sem Messi var ósáttur við er að hann var einhverra hluta vegna tekinn í ítarlegra próf en hinir.

„Af þeim fimm sem voru teknir í lyfjapróf var ég sá eini sem þurfti að gefa bæði þvag- og blóðsýni. Frekar skrítið," skrifaði Messi á Instagram-síðu sína.

Það er kannski ekkert skrítið að menn vilji rannsaka hann sérstaklega enda ómannlegt hversu vel hann spilar fótbolta.