Nasri: Hreinsanir væntanlegar hjá City ef liðið fer ekki áfram

Samir Nasri, franski miðjumaðurinn hjá Manchester City, telur að leikmannahópurinn verði tekinn til gagngerrar endurskoðunar takist liðinu ekki að komast áfram upp úr sínum riðli í Meistaradeildinni.

Manchester City er í botnsæti síns riðils þegar aðeins tvær umferðir eru eftir og í kvöld kemur topplið Bayern München í heimsókn á Etihad-leikvanginn þar sem City verður helst að vinna til að eiga raunhæfa möguleika á sæti í sextán liða úrslitunum.

„Við verðum að gera eitthvað því annars verða komnir hingað nýir leikmenn á næsta ári," sagði Samir Nasri við BBC.

Manchester City hefur aldrei komist lengra í Meistaradeildinni en í sextán liða úrslit og hefur tvisvar sinnum setið eftir í riðlinum á síðustu þremur árum.

City-liðið gæti verið úr leik eftir kvöldið, tapi liðið og CSKA Moskva eða Roma vinna þegar þau mætast í Rússlandi.

„Verum bara hreinskilnir. Miðað við launin hjá leikmönnum okkar og þá staðreynd að 90 prósent leikmannahópsins eru í heimsklassa þá væri það mikið áfall fyrir félagið ef liðið kæmist ekki í sextán liða úrslit Meistaradeildarinnar," sagði Nasri við blaðamenn.