Krefja Balotelli um afsökunarbeiðni

Staðarblaðið Liverpool Echo krafðist þess á forsíðu í dag að Mario Balotelli, framherji Liverpool, biðjist afsökunar á því að hafa skipst á treyjum við Pepe, varnarmann Real Madrid, í hálfleik í leik liðanna í Meistaradeild Evrópu í gær.

Balotelli hefur ekki náð sér á strik eftir að hann kom til Liverpool í sumar og átti dapran dag þegar Liverpool tapaði fyrir Evrópumeisturunum, 3-0, í gær. Honum var skipt af velli í hálfleik en hann og Pepe skiptust á treyjum þegar þeir gengu til búningsklefa.

Liverpool Echo segir að með því hafi hann brugðist stuðningsmönnum Liverpool og vegna þess verði hann að biðjast afsökunar.