Benitez sigraði en Wenger komst áfram

Napólí lagði Arsenal 1-0 að velli í F-riðli Meistaradeildar Evrópu í knattspyrnu í kvöld. Arsenal fór þó áfram í 16-liða úrslitin.

Markalaust var í Napólí fram á 73. mínútu. Þá skoraði Gonzalo Higuaín fyrir heimamenn og allt ætlaði um koll að keyra. Þá var staðan í leik Marseille og Dortmund 1-1 og því hefði Napólí komist áfram.

Enn bættist staða Napólí þegar Mikael Arteta sá rautt skömmu síðar. Tvö mörk til viðbótar hefðu tryggt Napólí sæti í 16-liða úrslitum óháð úrslitunum í Frakklandi.

Dortmund skoraði hins vegar sigurmarkið gegn Marseille skömmu síðar og ekkert annað í stöðunni fyrir lærisveina Rafa Benitez en að skora tvö mörk til viðbótar. Mark Jose Callejón tryggði 2-0 sigur en það var ekki nóg.

Dortmund vinnur riðilinn, Arsenal hafnar í öðru sæti og Napólí fer í Evrópudeildina líkt og Juventus sem tapaði fyrr í dag gegn Galatasaray.