Myrkvi vann Evrópuverðlaun

Myrkvi frá Borg Brugghúsi náði Evrópumeistaratitli í flokki kaffi- og súkkulaðibættra bjóra á hátíðinni World Beer Awards 2013.

Verðlaunin eru með virtustu bjórverðlaunum í heimi, haldin árlega í Asíu, Evrópu og Bandaríkjunum. Dómnefndir smakka blint fjöldann allan af tegundum í mismunandi flokkum og gefa einkunn.

„Myrkvi er þróaður í samstarfi við Reykjavík Roasters og kaffið sérstaklega valið inn í uppskriftina.  Við erum mjög ánægðir með útkomuna og gaman að fá þessa miklu viðurkenningu.  Hugmyndin með bjórnum var að brugga porter-öl sem væri sérstaklega gott með steikum og ýmsum bragðmeiri mat en aukreitis virkar hann frábærlega með ýmsum eftirréttum, svo sem súkkulaði,“ segir Valgeir Valgeirsson bruggmeistari.

Fleiri bjórar frá Borg Brugghúsi sátu á verðlaunapallinum. Bríó hlaut brons í flokki ljósra þýskra lagerbjóra, Úlfur nr. 3 fékk svo silfurverðlaun í flokknum IPA-bjóra (Indian Pale Ale) og Egils Lite hlaut bronsverðlaun í flokki lág kolvetna bjóra.