Benitez vill halda hreinu

Rafa Benitez, knattspyrnustjóri Liverpool, segir það algjört lykilatriði fyrir lið sitt að halda hreinu á heimavelli sínum í fyrri leik sínum við Juventus í vikunni. "Lið Juventus er gríðarlega sterkt og skipað frábærum leikmönnum eins og Pavel Nedved og Allesandro del Piero, en ég held að þeirra aðalstyrkur sé samt frábær liðsheild. Við erum álitnir lakara liðið af öllum fyrir þessa leiki og ég held að Juve væri álitið sigurstranglegra jafnvel þó við værum með okkar sterkasta lið," sagði Benitez, sem verður án nokkurra lykilmanna í fyrsta leiknum, sem bæði eru meiddir eða eru ólöglegir í Meistaradeildinni. "Þetta verður gríðarlega erfiður leikur og það fyrsta sem við verðum að hafa í huga er að reyna að fá ekki á okkur mark á heimavelli, því það gæti reynst okkur mjög erfitt," sagði Benitez.