Liverpool tekst á við Juventus

Liverpool mætir Juventus í átta liða úrslitum Meistaradeildar Evrópu, en dregið var í höfuðstöðvum Knattspyrnusambands Evrópu í Nyon í Sviss í morgun. Þá mætir Chelsea Bayern München og Mílanóliðin AC Milan og Inter berjast um sæti í undanúrslitum. Loks mætir franska liðið Lyon hollenska liðinu PSV Einhoven. Fyrri leikir liðanna fara fram 5. og 6. apríl en þeir síðari viku síðar. Þá var einnig dregið um hvaða lið mæstast í undanúrslitum. Sigurvegarinn í viðureign Liverpool og Juventus mætir þeim sem hefur betur í einvígi Chelsea og Bayern og sigurvegarinn í slag AC Milan og Inter mætir annaðhvort PSV Eindhoven eða Lyon. Þeir leikir fara fram 26. og 27. apríl og 3. og 4. maí, en úrslitaleikurinn fer fram í Istanbúl í Tyrklandi 25. maí.