Kjarni málsins sé að Inga hafi ekki sagt al­veg rétt frá

Hann segir „vík milli vina“ Guðmundar Inga og Ingu Sæland og þess vegna verði málið dramatískt. Guðmundur Ingi hafi fylgt henni eins og skugginn í um áratug og það skýri hvers vegna umræða um afsögn hans og aðdraganda þess sé svo tilfinningaþrungin og sterk núna.

Allt ætlaði um koll að keyra í þinginu í gær þegar Inga Sæland var spurð út í aðdraganda þess að Guðmundur Ingi Kristinsson sagði af sér embætti mennta- og barnamálaráðherra. „Ég held að þér væri nær að stíga inn í eigin skítapott og reyna að hræra aðeins upp í honum í stað þess að koma hér fram með dylgjur og ósannindi,“ sagði Inga meðal annars við formann Sjálfstæðisflokksins, Guðrúnu Hafsteinsdóttur. 

Skilaboði frá aðstoðarmanni

Ummælin koma í kjölfar þess að birt voru skilaboð sem Guðmundi Inga bárust frá Guðbjörgu Ingunni Magnúsdóttur, þáverandi aðstoðarmanni hans, í janúar þegar hann var nýkominn af sjúkrahúsi eftir hjartaaðgerð.

Í skilaboðunum var honum tjáð að ákvörðun hefði verið tekin um að hann léti af ráðherraembætti. Honum voru boðnir tveir kostir, að tilkynna sjálfur um afsögn sína eða fara í stríð við forystu flokksins. Guðbjörg er eiginkona Ragnars Þórs Ingólfssonar, sem tók sæti í ríkisstjórninni í kjölfar ráðherraskiptanna.

Málið hefur verið í umræðunni um nokkurt skeið eftir að Guðmundur Ingi greindi frá því að Inga Sæland hefði gert honum að segja af sér ráðherradómi.

Birgir segir umræðurnar á þingi í gær hafa sprungið í loft upp og orðið „skítapottur“ hafi dómínerað umræðuna. Hann segir orðið hvergi til í orðabók en fólk hafi eflaust tilfinningu fyrir því hvað það þýði.

„Kjarni málsins sem fer þarna inn á þingið er að það er verið að segja að Inga Sæland hafi ekki sagt alveg satt frá þessu. Hún hafi verið að draga úr og fegra sinn hlut í þessu máli sem virðist vera alveg rétt miðað við þessi skilaboð,“ segir hann og að það virðist, sem dæmi, að það hafi verið búið að ákveða fyrir Guðmund Inga að hann ætti að víkja. Forystukonurnar þrjár í ríkisstjórninni hafi allar verið sammála um það.

„Ég get ekki lesið öðruvísi í orð Kristrúnar en að hún hafi vitað af því og verið með í því,“ segir Birgir en Kristrún sagði í samtali við fréttastofu í gær að það væru tvær hliðar á málinu. Guðmundur Ingi hefði tekið sína ákvörðun sjálfur, en svona ákvörðun væri ekki tekin í tómarúmi. 

Birgir segir greinilegt að þessi ákvörðun hafi legið fyrir en svo sé mögulega óljóst hvert nákvæmlega hlutverk aðstoðarmannanna er. Þar geti verið að menn upplifi hlutina á ólíkan hátt. Birgir segir þetta tilfinningaþrungið og sé eiginlegur skilnaður á milli vina þarna.

Skrælir tilfinningarnar frá

„En þegar maður skrælir þessi tilfinningamál af þá er það sem stendur eftir að hún sagði opinberlega ekki alveg rétt frá, miðað við það sem var sagt,“ segir Birgir og það sé það sem Guðrún hafi stokkið á í þinginu í gær.

Birgir segir þetta auðvitað oft gerast og í raun hversdagslegur hlutur að það slitni úr vinskap í stjórnmálum. En í heild líti málið ekki vel út tilfinningalega gagnvart heilindum þessarar ríkisstjórnar og þessara stjórnmálamanna.

Ásýndin geti skipt jafn miklu og veruleikinn

„Ásýndin getur skipt alveg jafn miklu máli og veruleikinn,“ segir hann og að það sé afar óheppilegt að þetta æxlist svona, að aðstoðarmaður Guðmundar Inga sé svo eiginkona Ragnars Þórs, sem endar á því að taka við ráðherraembætti í stað hans.

„Ég hef engar sérstakar ástæður til að ætla að það hafi skipt einhverju verulegu máli en það gæti það. Þetta er svona og er óheppilegt sérstaklega fyrir þau.“

Sjá einnig: Björn Leví telur ein­sýnt að Guð­mundur Ingi hafi verið beittur of­beldi

Hann segist þó lesa í skilaboð Guðbjargar að hún sé að reyna að ráða honum heilt í málinu og það sé vafasamt að gera of mikið úr því.

„Það eru afarkostir sem hann stendur frammi fyrir,“ segir Birgir og því þegar forystukonur ríkisstjórnar segi að hann hafi sjálfur sagt af sér þá sé það mögulega ekki alveg rétt

„Ef þú játar á þig eða segir eitthvað undir þrýstingi þá er svona spurning hversu mikið það skiptir máli, hversu satt og rétt það er.“

Birgir telur að þetta mál geti rýrt traust á bæði Flokki fólksins og Ingu Sæland.

„Það eru aðallega álitshnekkir fyrir hana en líka fyrir ríkisstjórnina, þær hafa tamið sér, þær stökkva alltaf í vörn hver fyrir aðra og þá verða smitunaráhrif,“ segir hann.

Hvort ríkisstjórnin megi við miklu meira segir Birgir að hann telji að þetta mál muni líklega líða hjá en það geti kvarnast úr traustinu og bæst við Evrópumálin sem hafi áhrif á ríkisstjórnina.

Hvers konar flokkur Flokkur fólksins er

Hann segir það svo undirliggjandi stórmál í þessu öllu hvers konar flokkur Flokkur fólksins er.

„Þetta er eiginlega svona foringjaflokkur,“ segir hann og að Inga hafi oft sagt frá því að hann hafi orðið til við eldhúsborðið heima hjá henni og sé hennar flokkur.

„Það eru ekki þessir ferlar sem þarf og eru til staðar í eldri flokkum, það eru stofnanir og leið til þess að gera eitthvað,“ segir hann og að þó svo að formenn ráði í öðrum flokkum hverjir verði ráðherrar sé yfirleitt farið í gegnum þingflokkinn með það sem verður að samþykkja.

„Ráðherrarnir sitja í umboði þingflokksins en ekki í umboði formannsins.“