Komin með ný nöfn

Bjarki Sigurðsson skrifar 3. september 2026 14:55

Við formlega afhendingu 1. september. Frá vinstri: Hrafnhildur Karlsdóttir, hótelstjóri Hótel Reykjavík Öskju, Jón Kolbeinn Guðjónsson, framkvæmdastjóri framkvæmda hjá Reitum, Ingólfur Haraldsson, svæðisstjóri hótela í Reykjavík hjá Íslandshótelum, Davíð Torfi Ólafsson, forstjóri Íslandshótela, Guðni Aðalsteinsson, forstjóri Reita, Ólöf Guðmundsdóttir, hótelstjóri Hilton Reykjavík, Hjörtur Valgeirsson, framkvæmdastjóri rekstrarsviðs hjá Íslandshótelum, Svana Huld Linnet, framkvæmdastjóri viðskiptavina hjá Reitum. Reitir

Hótelin sem áður hétu Hilton Reykjavík Nordica og Berjaya Reykjavík Natura Hotel eru nú orðin hluti af rekstri Íslandshótela. Hótelin heita nú Hilton Reykjavík og Hótel Reykjavík Askja.

Íslandshótel tóku við rekstrinum 1. september af Berjaya eftir að hið síðarnefnda náði ekki að semja við Reiti um áframhaldandi leigu á hótelunum. Stefnt er á að þrír milljarðar verði settir í endurbætur þar og stóð til að endurráða allt starfsfólk.

Hótelin hafa borið hin ýmsu nöfn í gegnum árin. Þeir minnugustu muna líklegast eftir upprunalegu nöfnunum, Hótel Esja og Hótel Loftleiðir. Bæði hótel eru voru hönnuð af Gísla Halldórssyni arkitekt sem hannaði meðal annars Þjóðarleikvanginn í Laugardal og Laugardalshöll.

Hótel Loftleiðir við Öskjuhlíð í Reykjavík árið 1967.Ólafur K. Magnússon/LJósmyndasafn

Í fréttatilkynningu frá Reitum vegna breytinganna er sagan rekin.

„Árið 1962 var fyrsta skóflustungan tekin að stórbyggingu sem átti að hýsa skrifstofur Loftleiða og hótel á Reykjavíkurflugvelli. Hótelbyggingin reis á árunum 1965-1966 og var stækkuð til muna með nýrri álmu sem opnaði árið 1971. Fjölmargt þekkt fólk hefur gist á hótelinu. Þegar Bobby Fischer og Boris Spassky þreyttu heimsmeistaraeinvígið í skák 1972 bjó sá fyrrnefndi allan tímann í svítu á Hótel Loftleiðum og þótti nokkuð sérviskulegur í háttum,“ segir í tilkynningunni.

Mynd frá því í janúar 1965. Lögreglan skipar ökumönnum að þrífa framrúður bifreiða sinna á ofanverðum Laugavegi. Bensínstöð Shell í forgrunni. Fjær eru nýbyggingar við Suðurlandsbraut. Bragi Guðmundsson/Ljósmyndasafn

Við brottför af hótelinu þakkaði Bobby starfsfólki innilega fyrir hjálpsemi, vinsemd og góða umönnun á meðan hann dvaldi þar.

„Hótelið var endurnýjað árið 2011 en á því eru 220 herbergi og byggir hvert þeirra á einu þema sem sótt er til íslenskrar náttúru: jarðhita, norðurljósa, eldvirkni og vatns. Nýja nafnið Hótel Askja er sömuleiðis vísun til íslenskrar náttúru og Öskjuhlíðarinnar sem veitir róandi græna umgjörð um næsta nágrenni hótelsins sem er þó steinsnar frá miðbænum,“ segir í tilkynningunni.

Hótel Esja var tekið í notkun árið 1970 og var þá í eigu bílakóngsins Kristjáns Kristjánssonar frá Akureyri. Bob Dylan gisti þar sumarið 1990 þegar hann hélt tónleika í Laugardalshöll þar sem hann náði með listilegum hætti að forðast blaðamenn og aðdáendur sem höfðu safnast saman fyrir utan.

„Hann hafði þá fengið lánað reiðhjól á hótelinu og hjólaði á svæðið eftir annarri leið en fólk bjóst við. Hann komst því óséður bakdyramegin inn í höllina,“ segir í tilkynningunni.

Hótel á Íslandi Reykjavík Ferðaþjónusta

Mest lesið

Fleiri fréttir