Guðni Ei­ríks­son: ,,Við spilum fyrir þetta fólk og munum alltaf gera það”

„Mér fannst erfitt að horfa á leikinn. Það var mikil spenna í honum frá upphafi til enda,“ sagði Guðni eftir leik.

Apollon skoraði eina mark leiksins strax á 9. mínútu og minnkaði þar með forskot FH í einvíginu niður í eitt mark.

„Við fengum mark á okkur snemma og það var alls ekki gott. Eftir það þurftum við að halda í þessa aumu forystu í langan tíma. En gott og blessað, það skiptir engu máli núna. Við héldum þetta út, unnum einvígið og komum klúbbnum áfram í næstu umferð.“

Guðni sagði leikáætlun FH bæði hafa gengið upp og mistekist, eftir því hvernig litið væri á málið.

„Já og nei. Hún gekk ekki upp að því leyti að við skoruðum ekki, en hún gekk upp að því leyti að við unnum einvígið og komum FH áfram í næstu umferð.“

„Við höfum dregið mikinn lærdóm af sumrinu og það er sömuleiðis dýrmæt reynsla fyrir okkur að spila leik af þessari stærðargráðu. Við erum yngsta liðið í þessari Evrópukeppni. Þarna voru mjög ungir leikmenn að mæta fullorðnum konum og spennustigið var eðlilega hátt. Átta leikmenn sem spiluðu í dag voru að spila með ÍH í 2. deild fyrir aðeins tveimur árum.“

Næsta verkefni FH er deildarleikur á sunnudaginn og sagði Guðni að nú tæki við endurheimt. Hann viðurkenndi þó að hugurinn leitaði einnig að næsta Evrópuverkefni.

„Það er leikur á sunnudaginn og það er næsta verkefni. Nú þurfum við fyrst og fremst að endurheimta. Við erum þó að sjálfsögðu mjög spennt fyrir drættinum og því að sjá hvað tekur við í Evrópu.“

Að lokum þakkaði Guðni stuðningsmönnum FH fyrir að fjölmenna í Kaplakrika og styðja liðið áfram.

„Við erum ógeðslega þakklát fyrir stuðninginn sem við fengum hér í dag. Það voru rúmlega 500 FH-hjörtu í stúkunni. Við spilum fyrir þetta fólk og munum alltaf gera það.“