Náði að plata Óskar Örn

Eftir sjö ár í 2. deild leika Haukar í Lengjudeild karla á næsta tímabili. Þetta var ljóst eftir 5-2 sigur á Dalvík/Reyni á Ásvöllum á sunnudaginn. Guðjón Pétur tók við liðinu í vetur.

„Ég náttúrulega var búinn að vera leikmaður tvö ár á undan þannig að maður þekkti hópinn vel og maður vissi svo sem að það vantaði ekkert endilega gæðin í hópinn en það vantaði kannski ákveðið know-how. Það er náttúrulega ótrúlega dýrmætt að hafa fengið annars vegar Gunnlaug Fannar, Pablo [Punyed] og Jonna og Einar Karl, til að leiða þetta vinningseðli inn í hópinn,“ segir Guðjón í Sportpakkanum á Sýn í gær.

Allir stigu upp

„Mér finnst við hafa náð að binda þetta vel saman, ekki bara innan vallar heldur utan vallar líka. Við stofnuðum þarna Máttarstólpa sem eru mjög öflugir menn í kringum þetta. Stjórnin steig upp og meistaraflokksráð er orðið mjög öflugt og við höfum gert þetta mjög heildstætt alls staðar. Miðað við allt sem við erum með hérna í kringum okkur, aðstöðuna núna og nýja baklandið og fólk með mikinn metnað, þá að sjálfsögðu setjum við stefnuna á að ná árangri og það liggur svolítið í augum uppi að við ætlum auðvitað að gera góða hluti og félagið verður hundrað ára 2031, þannig að ég ætla að lofa því að við verðum komnir upp fyrir það.“

Nýtt knattspyrnuhús Hauka gjörbreytir allri umgjörð fyrir allt félagið.

„Það ýtir bara undir áhuga hjá krökkum, aðstaðan batnar, foreldrar hætta kannski að keyra með börnin upp í Kaplakrika til þess að vera inni, þannig að við erum bara að njóta góðs af og við munum njóta góðs af, sérstaklega þegar til lengri tíma er litið.“

Þjálfarateymi Hauka er með því reynslumesta á Íslandi og sérstaklega inni á vellinum. Þarna má telja saman fjölmarga Íslandsmeistaratitla.

„Það er enn þá hálf ótrúlegt að ég hafi náð að plata Óska [Örn Hauksson] með mér í þetta, Daða [Lárusson] og svo má ekki gleyma auðvitað Pablo og Ævari Daða. Ég ætla að segja ykkur frá einum galdrakarli úr Árbænum sem hefur séð um öll föstu leikatriðin hjá okkur og verið að greina leikina. Sama með Óskar, hann er búinn að koma mjög sterkt inn í þetta, hann hefur verið með mér með liðið, við erum saman með þetta. Pablo með sína reynslu og svo má aldrei gleyma pabbanum, Daða Lár, sem hefur verið okkar lærifaðir þegar ýmis mál hafa komið upp og með sinni stóísku ró hefur hann hjálpað okkur að taka góðar ákvarðanir.“