Kíkti í kaffi til kanslarans

„Við Merz ræddum m.a. stöðu mála á alþjóðasviðinu, bárum saman bækur um innanlandspólitík og fórum yfir Evrópumálin,“ segir Kristrún í færslunni.

„Hann hefur ríkan skilning á mikilvægi smáríkja eins og Íslands í alþjóðasamstarfi. Þýskaland er einn af okkar helstu bandamönnum og metur sambandið við Ísland mikils. Þetta var gott spjall og við stefnum á að hittast aftur með formlegri hætti síðar,“ segir Kristrún en fundur þeirra fór fram í Berlín, höfuðborg Þýskalands.

Kristrún hefur verið sýnileg á alþjóðasviðinu síðustu vikur. Ekki er betur hægt að sjá en hún hafi stimplað sig í hjörtu tyrknesku þjóðarinnar þegar hún var stödd þar á Nató-ráðstefnu í byrjun mánaðar en fjöldi fylgjenda hennar hefur síðan þá farið úr tuttugu þúsund í rúmlega 270 þúsund.

Þá hefur viðtal hennar í hlaðvarpinu The Rest is Politcs vakið mikla athygli og hún þakkar fyrir viðtökurnar í nýlegri færslu. Virðist sem fólk, þvert á hinn pólitíska ás, geti verið sammála um að hún hafi þar verið landinu til sóma. 

„Þá vil ég þakka fyrir góðar viðtökur og falleg skilaboð eftir að viðtalið við mig í hlaðvarpinu Rest is Politics birtist á mánudaginn. Takk öll kærlega fyrir að hlusta,“ segir Kristrún í færslunni.