Þróttur tók topp­sætið af Aftur­eldingu tveimur mönnum fleiri

Toppslagurinn í Lengjudeild karla er gríðarlega jafn en fyrir leiki kvöldsins voru aðeins þrjú stig milli toppliðsins og fjórða sætis.

Á 28. mínútu fékk Þróttur vítaspyrnu þar sem Kári Kristjánsson steig á punktinn og skoraði örugglega. Stuttu eftir það myndaðist mikill hiti hjá varamannaskýlum beggja liða sem endaði með því að Enes Cogic, aðstoðarþjálfari Aftureldingar, fékk rautt spjald.

Á 35. mínútu bætti Aron Snær Ingason við öðru marki Þróttar. Eftir markið náði Þróttur að vinna boltann og komst í skyndisókn þar sem Örn Bragi Hinriksson var að sleppa inn fyrir vörn Aftureldingar. Andi Hoti felldi hann og fékk rautt spjald að launum.

Staðan var virkilega slæm fyrir Aftureldingu sem var tveimur mörkum undir og manni færri þegar tæpar 50 mínútur voru eftir. Áður en flautað var til hálfleiks bætti svo Aron Snær við sínu öðru marki og Þróttur var 3-0 yfir í hálfleik.

Snemma í seinni hálfleik bætti Örn Bragi Hinriksson við fjórða marki Þróttar og öll von fyrir Aftureldingu var endanlega úti. Undir lok leiks skoraði Trausti Þráinsson sárabótamark fyrir Aftureldingu. Lokatölur leiksins er mikilvægur 4-1 sigur Þróttar á Aftureldingu.

Með sigrinum hrifsar Þróttur toppsæti Lengjudeildar karla af Aftureldingu. Fylkir er með jafn mörg stig og Þróttur en mun betri markatala heldur þeim í toppsætinu. Afturelding féll úr toppsætinu niður í það þriðja eftir leikinn. Liðið á þó leik til góða og getur endurheimt toppsætið með sigri.

Upplýsingar um atvik leiksins fengin af Fótbolti.net