Boðar frekari breytingar

Á fyrstu sex mánuðum ársins sóttu sex hundruð sjötíu og fimm um alþjóðlega vernd á Íslandi. Þetta er svipaður fjöldi og í fyrra en þá voru umsækjendur sex hundruð og fimm á sama tía. Árið áður, eða 2022, voru þeir töluvert fleiri eða ellefu hundruð tuttugu og tveir. Ríflega sjötíu prósent umsækjenda voru frá Úkraínu og næstflestir, eða ellefu prósent, frá Venesúela.

„Ég held að það sé að komast meiri stöðugleiki á í þessum málaflokki. Mér finnst við vera að ná betri stjórn á honum. Tölurnar eru þannig að yfirgnæfandi meirihluti þeirra sem sækja um alþjóðlega vernd á Íslandi er fólk frá Úkraínu. Afstaða ríkisstjórnarinnar á Íslandi, eins og alls staðar í Evrópu, hefur verið sú að taka á móti því fólki,“ segir Þorbjörg Sigríður Gunnlaugsdóttir dómsmálaráðherra.

Hún segir flokk sinn leggja áherslu á að þeir sem hingað komi fái góðar móttökur og raunveruleg tækifæri til að spjara sig í samfélaginu. 

„Í því felst auðvitað líka að við höfum stjórn á fjöldanum, þannig að ég held að þarna geti tvö markmið farið saman. Við erum komin út úr þeim veruleika að tölurnar séu að stækka ár frá ári og þær eru að nálgast það að vera viðráðanlegri en þær hafa verið á liðnu ári,“ 

Á nýafstöðnu þingi voru fjögur frumvörp tengd útlendingamálum samþykkt á Alþingi og segir Þorbjörg Sigríður fyrirhugað að leggja næsta vetur fram fleiri mál.

„Þetta eru mál sem varða dvalarleyfi, reglur um dvalarleyfi og ég myndi kannski líka segja það að ríkisstjórnin er að komast upp úr þeim hjólförum að ræða útlendingamál og innflytjendamál alltaf bara út frá því fólki sem er að sækja um alþjóðlega vernd. Við erum að horfa heildstætt á málaflokkinn.“

Þá segir hún að koma brottfararstöðvar muni hafa áhrif en hún verður að veruleika á þessu ári.

„Á öllum þeim fundum sem ég hef setið, Schengen-fundum og með innanríkis- og dómsmálaráðherrum Evrópu, þá kemur það mjög skýrt fram að hluti af því að ná stjórn á umsóknum og málaflokknum öllum sé að það sjáist að kerfið í hverju landi fyrir sig virkar.“