Lite-æðið hafi Ís­lendinga að fíflum

Ekki nóg með það að bjórar á borð við Gull og Víking séu til í Lite-útgáfu, heldur fékk Ölgerðin í fyrra leyfi til þess að brugga sérstakan Tuborg Lite og Coca Cola hefur nýlega tilkynnt að Thule, sem bruggaður hefur verið í sextíu ár, verði nú aðeins til sem Lite-bjór.

En breytir það einhverju þó að bjór sé lite? Er hann mikið hollari?

„Nei, ég held að það sé ekkert þannig séð mikið hollara. Það eru færri hitaeiningar ef við erum að horfa á það. Það er talið að hann hafi minni áhrif á blóðsykurinn, en ef við horfum heilt yfir og heildrænt þá er þetta áfengi og það er lifrin sem skiptir máli í þessu samhengi,“ segir Elísabet Reynisdóttir næringarfræðingur í samtali við fréttastofu.

Bjór er vissulega enn þá bara bjór og Elísabet segir að hollasta leiðin til þess að drekka bjór sé einfaldlega að drekka minna af honum.

Vert er að taka fram að þegar talað er um „lite“ sé ekki um svokallað léttöl að ræða sem finna má í matvöruverslunum, heldur er átt við kolvetnaskertan bjór sem inniheldur færri kalóríur en gengur og gerist en er alla jafna með um 4 til 5 prósenta áfengishlutfall.

Tvær af feitustu þjóðunum vilja lite

Í nýrri skýrslu NORMO er dregin upp dökk mynd af venjum íbúa á Norðurlöndunum. Við borðum illa og of mikið, hreyfum okkur of lítið og ofþyngd er orðin algengari. Rúmur helmingur fullorðinna er of þungur og eitt af hverjum fjórum börnum. Íslendingar komu verst út úr skýrslunni hvað ofþyngd varðar, en sjötíu prósent fullorðinna eru í yfirþyngd.

Margir kynnu því að spyrja sig hvers vegna lite-bjór sé sérstaklega vinsæll á Íslandi og í Bandaríkjunum, sem eru báðar í hópi feitustu þjóða heims.

„Ég held að það sé alveg ljóst að það er verið að markaðssetja þar sem vandamálið er. Þar sem er ofþyngd er auðvelt að markaðssetja sykurlaust. Það er auðvelt að markaðssetja bjór með færri hitaeiningum. Það er verið að telja okkur trú um að neyslan á þessum vörum sé örugg og sé betri fyrir okkur af því að við erum þjóð í ofþyngd. En ég held að þetta eru bara enn og aftur markaðsöfl sem eru að fífla okkur,“ segir Elísabet.

Líkist sykurlausa æðinu

Hún nefnir að lite-æðið líkist í raun hverri annarri tískubylgju, eins og steinefnasöltum og kollageni. Sem dæmi má nefna sykurlausa gosdrykki, sem hafa að undanförnu tröllriðið gosdrykkjamarkaðnum síðustu ár. En merki eru um að það sé tekið snúast við; sem dæmi má nefna Pepsi með „upprunalegu bragði“ og Orku sem var sérstaklega markaðsett með sykri.

Eru þá lite bjórinn enn annað tískufyrirbærið?

„Ég held að þetta sé svolítið það sem við þurfum sem neytendur að gera okkur grein fyrir. Hvað er það sem við viljum? Upprunalega varan og að drekka kannski aðeins minna af venjulegum bjór eða viljum við hafa lite og halda að við séum í einhverri öruggri neyslu af því að þetta sé lite bjór? Ég held að það sé vandamál sem gerist, að við drekkum bara meira af lite heldur en af venjulegum bjór.“

Í sjónvarpsfrétt er sagt að Ísland og Bandaríkin séu feitustu þjóðir heims. Það er ekki rétt, heldur eru þær meðal feitustu þjóða heims.