Björguðu lambinu sem vildi ært komast til frænda sinna

Valdís Huld Jónsdóttir, formaður Björgunarsveitar Hafnarfjarðar, segir í samtali við Vísi að björgunaraðgerðin hafi gengið afskaplega vel í kvöld. Björgunarsveit Suðurness kom einnig að aðgerðinni.

Fyrr í dag ræddi Vísir við Teit Þorkelsson leiðsögumann, sem brá verulega í brún í morgun þegar hann rakst á lambið, sem sat fast á brún í Krýsuvíkurbjargi og jarmaði ítrekað innan við mávagargið í klettinum. 

Í kjölfarið fóru björgunarsveitir á vettvang til að kanna hvort hægt væri að bjarga lambinu.

Björgunarsveit Hafnarfjarðar tók upp þessi myndskeið af aðgerðinni.

„Það gekk vonum framar,“ bætir Valdís við.

Hún útskýrir að tveir björgunarmenn hafi sigið niður til lambsins þar sem það stóð ráðalaust í bjarginu. Þeir hafi náð því í net og þannig komið því aftur upp. 

„Þannig það er bara hérna á beit,“ segir Valdís og tekur fram að lambið virðist ekki slasað og að það plumi sig nú vel.

Lét á endanum bjarga sér

Fyrst um sinn hafi lambið verið nokkuð skelkað við björgunarsveitarmennina.

„Það var vissulega stíft í byrjun, en að lokum ákvað það að koma til okkar og láta bjarga sér,“ segir Valdís. Björgunarmenn héldu á lambinu alla leiðina svo það færi sér ekki að voða aftur, að sögn Valdísar.

„Það var svo mjög spennt þegar við komumst aftur upp úr siginu. Það var ótt að komast til annarra kinda hér í kring.“