Hægt að ráð­stafa sér­eign í októ­ber frá og með 1. janúar

Ráðstöfunin var fyrst kynnt árið 2014 undir formerkjum leiðréttingar og var hægt að sækja um hana á heimasíðunni leiðretting.is. Samkvæmt upplýsingum frá Skattinum, sem sér samkvæmt nýju lögunum um framkvæmd laganna, kemur fram að undirbúningur sé hafinn hjá embættinu.

Samkvæmt svari skattsins þarf að þróa nýtt kerfi hjá Skattinum fyrir umsóknir. Hægt verði að nota eitthvað úr eldri kerfum en nokkur atriði séu með ólíkum hætti.

Samkvæmt svari embættisins kallar þetta á töluvert utanumhald sem ekki hafi verið til staðar áður. Auk þess stefni Skatturinn að því að gera kerfið betur úr garði en áður.

Geta ráðstafað samanlagt en ekki bara samfellt

Nú sé til dæmis heimild samkvæmt lögum til að ráðstafa séreign samanlagt í 120 mánuði en var áður í samfellda 120 mánuði. Stefnt verði að því að unnt verði að sjá hversu langan tíma af 120 mánuðunum viðkomandi hefur þegar nýtt og jafnframt hversu langur tími er eftir af heimildinni.

Í svari embættisins er einnig vakin athygli á því að eldra „leiðréttingakerfi“ um ráðstöfun á séreignarsparnaði átti að gilda í tvö og hálft ár en var ítrekað framlengt í stuttan tíma í einu. Af þessum ástæðum hafi þurft að smíða kerfið á stuttum tíma og vegna þess að um var að ræða tímabundna ráðstöfun hafi ekki verið ráðist í umfangsmiklar umbætur á því þar sem óljóst var hversu lengi heimildirnar yrðu í gildi.

Eins og áður segir tekur úrræðið gildi 1. október en samkvæmt svari verða upplýsingar um framkvæmd úrræðisins, umsóknarferlið og tímasetningar birtar á vef Skattsins eftir því sem undirbúningi vindur fram.