Konum sem beita heimilis­of­beldi fjölgar

Í tilkynningu ríkislögreglustjóra kemur fram að hlutfall kvenna hafi hækkað jafnt og þétt undanfarin ár, úr 17 prósentum árið 2021 í 24 prósent árið 2025, og hafi ekki mælst hærra á tímabilinu. Þar segir einnig að helst megi rekja þessa hækkun til mála þar sem fólk tengist fjölskyldutengslum.

Tilkynningum um ágreining milli skyldra og tengdra aðila fækkaði verulega milli ára samkvæmt tilkynningu. Karlar eru þó enn í miklum meirihluta árásaraðila, eða 73,5 prósent og konur 67,9 prósent þolenda árása. Meðalaldur gerenda er samkvæmt skýrslu 36 ár og þolenda um 34 ár.

Í tilkynningu ríkislögreglustjóra kemur einnig fram að tilkynningum um ágreining milli skyldra eða tengdra aðila, þar sem ekki er grunur um brot, fækkaði úr 332 málum fyrstu þrjá mánuði ársins 2025 í 258 mál á sama tímabili 2026, eða um 22 prósent.

Heimilisofbeldismál, þar sem grunur er um brot á borð við líkamsárás, hótun eða eignaspjöll, eru mjög svipuð að fjölda og í fyrra, eða 327 tilvik samanborið við 322, samkvæmt tilkynningunni.

Þar kemur einnig fram að samanlagt hafi 585 tilvik heimilisofbeldis og ágreinings verið skráð á tímabilinu en 654 á sama tíma í fyrra og skýrist sú fækkun nær alfarið af færri ágreiningsmálum.

Fleiri makar sem beita ofbeldi en færri fyrrverandi

Í skýrslu ríkislögreglustjóra kemur fram að þegar heimilisofbeldismálin eru greind eftir tegund kemur í ljós að ofbeldi af hendi maka jókst úr 119 tilvikum fyrstu þrjá mánuði ársins 2025 í 135 tilvik sama tímabils 2026, eða um 13 prósent. Á móti fækkaði ofbeldi af hendi fyrrum maka úr 70 tilvikum í 61.

Ofbeldi foreldris í garð barns var 52 tilvik samanborið við 47 fyrstu þrjá mánuði ársins 2025 og ofbeldi barns í garð foreldris 57 tilvik samanborið við 51 á sama tíma í fyrra.

Karlmenn voru oftast gerendur þegar um var að ræða ofbeldi af hendi maka, núverandi eða fyrrverandi, eða í 78,2 prósent tilfella og konur þolendur í 74,4 prósent tilfella.

Þá fækkaði tilvikum sem flokkast undir endurtekna eða alvarlega hótun gegn lífi og heilsu samkvæmt 218. gr. b hegningarlaga úr 43 í 31 á sama tímabili. Beiðnir um nálgunarbann og/eða brottvísun voru 35, eða jafnmargar og á sama tímabili í fyrra.

Samkvæmt skýrslunni áttu um 73 prósent heimilisofbeldismála á tímabilinu sér stað á höfuðborgarsvæðinu og 27 prósent á landsbyggðinni. Þá voru 63 prósent ágreiningsmála á höfuðborgarsvæðinu og 37 prósent á landsbyggðinni.