Helmingur ó­á­nægður hefði Hildur valið Mið­flokkinn

Könnun Maskínu fór fram dagana 2. til 11. júní og voru svarendur 781 talsins. Gögn voru vegin út frá tölum Hagstofunnar um kyn, aldur og menntun. Svarendum voru gefnir svarmöguleikarnir mjög ánægð/ur, fremur ánægð/ur, í meðallagi ánægð/ur, fremur óánægð/ur eða mjög óánægð/ur. 

Umtalsvert meiri væntingar mælast til meirihluta Hildar Björnsdóttur en til meirihluta Heiðu Bjargar Hilmisdóttur sem tók við borgarstjórastólnum á vormánuðum 2025. Nærri helmingur, eða 46,1 prósent, ber fremur eða mjög miklar væntingar til nýs meirihluta nú samanborið fjórðungs væntinga  24,5%. Meira en helmingur bar litlar eða mjög litlar væntingar til fimm flokka meirihluta Heiðu á sínum tíma. Þar af sögðust 33,1% bera mjög litlar væntingar til gamla meirihlutans. Neikvæðar væntingar til meirihluta Hildar mældust samtals 29 prósent.

Samkvæmt niðurstöðum könnunarinnar virðast margir Reykvíkingar vera fegnir því að Hildur ákvað að leita í átt að miðjunni við myndun meirihluta. Hildur hóf á sínum tíma viðræður með flokkunum fjórum sem ekki tilheyrðu fráfarandi meirihluta en svo fór að myndaður var þriggja flokka meirihluti Sjálfstæðisflokks, Framsóknarflokks og Viðreisnar.

Samkvæmt könnun Maskínu hefðu 58,6 prósent Reykvíkinga verið fremur eða mjög óánægð með meirihluta Sjálfstæðisflokks og Miðflokks. Á sama tíma hefðu tuttugu og níu prósent Reykvíkinga verið ánægð með téðan meirihluta. Athygli vekur að það er umtalsvert minna en flokkarnir fengu í kosningunum, þar fengu þeir samtals 44,3% atkvæða.

Hætta að vera of litlir í sér

Mikil umræða var, bæði fyrir og eftir borgarstjórnarkosningar, um í hvaða átt framboðin myndu leita þegar kæmi að myndun meirihluta. Til að mynda var Björg Magnúsdóttir þráspurð um efnið í aðdraganda kosninganna uns hún loks aftók að ganga í samstarf með Miðflokknum í kappræðum Ríkisútvarpsins kvöldið fyrir kosningar.

Þá hitnaði fljótt undir Hildi Björnsdóttur strax og talið hafði verið upp úr kjörkössunum og ljóst var að hún stóð með pálmann í höndunum. Bárust meðal annars skeytasendingar frá Miðflokksmönnum sem sögðu Sjálfstæðismenn verða að hætta að vera of litlir í sér og ganga í eina sæng með Miðflokknum.

Ánægja með þriggja flokka meirihlutann sem myndaður var undir Hildi Björnsdóttur mælist meiri en óánægjan, 17,4% eru mjög ánægð og 24% fremur ánægð. Stór hluti Reykvíkinga er í meðallagi ánægður, eða 26,5% meðan óánægð eru í heildina 32,9%.

Væntingar til Hildar Björnsdóttur sem borgarstjóra Reykjavíkur eru nokkrar en 27,1% bera mjög miklar væntingar til hennar. Þá bera 20,9% fremur miklar væntingar til hennar á meðan litlar væntingar bera samtals 28,5%.