„Þetta hefur verið ó­trú­lega erfitt“

Eygló Fanndal missti af heimsmeistaramótinu síðasta haust vegna lítils brjóskloss í baki en þegar hún var að komast aftur á fullt meiddist hún svo aftur í vetur. Hún endaði þá á sjúkrahúsi þar sem leið yfir hana.

Eygló hafði rifið brjóskþófa í mjóbaki á æfingu og fór með hraði upp á spítala þar sem hún missti meðvitund þegar hún reyndi að ganga sjálf.

„Ég gat hvorki staðið upp né gengið og ég titraði og skalf,“ skrifaði Eygló á sínum tíma í færslu sinni á Instagram.

Tólf vikur liðnar

Eygló hefur síðan þurft að taka því rólega í lyftingunum á meðan hún byggir líkama sinn aftur upp.

Eygló fór aðeins yfir stöðuna á sér nú þegar tólf vikur eru síðan hún meiddist.

„Nú er komið að tólf vikna markinu,“ byrjaði Eygló en atvikið varð í marsmánuði síðastliðnum. Hún setti með myndband þar sem hún sést gera æfingar þar sem lóðin eru hvergi sjáanleg.

„Þjálfunin mín hefur litið nokkurn veginn svona út síðustu þrjá mánuði: mikið af kviðæfingum, æfingum í tækjum og æfingum sem miða að því að viðhalda styrk án þess að setja álag á brjóskþrofann,“ skrifaði Eygló.

Hefur reynt á þolinmæðina

„Markmiðið hefur verið að gefa honum þann tíma og hvíld sem hann þarf til að gróa áður en álagi er bætt við aftur smám saman. Þetta hefur verið ótrúlega erfitt og hefur reynt á þolinmæði mína og seiglu á þann hátt sem ég hefði aldrei getað ímyndað mér,“ skrifaði Eygló.

„Nú get ég loksins byrjað að auka álagið aftur. Aukningin verður lítil og hægfara en framfarir eru framfarir. Þetta ferli er langt frá því að vera búið og ég veit að það mun halda áfram að reyna á andlega styrkinn minn, en ég er komin svona langt og er staðráðin í að klára þetta,“ skrifaði Eygló.