Besta gengi Ítala á risamóti

Ítölum hefur aldrei gengið jafn vel á risamóti og núna á Opna franska mótinu í tennis. Þrátt fyrir að Ítalinn Jannik Sinner, sem er efstur á heimslistanum, sé dottinn úr mótinu.

Því miður getur ekki verið úrslitaleikur milli tveggja Ítala því allir eru þeir á sama væng á Opna franska mótinu í tennis. Matteo Berrettini og Matteo Arnaldi mætast í 8-liða úrslitum.

Arnaldi kemur í leikinn eftir maraþonleik gegn Bandaríkjamanninum Frances Tiafoe. Þar var Tiafoe nálægt því að vinna leikinn en Arnaldi svaraði í lokin og vann síðustu tvö settin. Leikurinn varði í fimm og hálfa klukkustund. Mótherji hans í 8-liða úrslitum er Berrettini. Hann fékk auðveldari leik og vann sinn mótherja í aðeins þrem settum.

Flavio Cobolli mætir Kanadamanninum Felix Auger-Aliassime sem er sigurstranglegur á mótinu og í fjórða sæti heimslistans. Ef Cobolli gerir sér lítið fyrir og vinnur Auger-Aliassime mætir hann sigurvegaranum úr leik Arnaldi og Barrettini.

Ein af ástæðunum fyrir velgengni Ítala í tennis er að ítalska tennissambandið gjörbreytti kerfinu sínu fyrir um fimmtán árum. Í staðinn fyrir að hafa eina akademíu í landinu þar sem öllum efnilegum leikmönnum er safnað saman er frekar verið að bæta aðstöðu leikmanna hjá sínum félögum.

Kostnaður við einstaklingsíþróttir getur verið mikill þar sem leikmenn þurfa sjálfir að borga ferðalög. Til að minnka kostnað hjá ítölskum leikmönnum voru haldin fleiri mót á Ítalíu þar sem leikmenn geta unnið sig upp stigalistann í tennis með lægri ferðakostnaði.

Þessi nýja aðferð ítalska tennissambandsins hefur greinilega skilað sér þar sem Ítalía er með sex leikmenn af efstu hundrað á ATP túrnum.