Gefa heila goð­sagnarinnar til rann­sókna

Heili Claude Lemieux verður nefnilega gefinn til CTE-miðstöðvar Boston-háskóla til rannsókna á langtímaáhrifum endurtekinna heilaáverka. Þetta tilkynnti fjölskylda hans í yfirlýsingu sem dóttir hans, Claudia Lemieux Bishop, sendi frá sér.

Lemieux framdi að sögn yfirvalda sjálfsvíg á fimmtudag en hann var sextugur. Fyrr í vikunni hafði hann verið kyndilberi Montreal Canadiens fyrir leik liðsins í úrslitakeppninni.

Lemieux spilaði nærri 1500 leiki í NHL-deildinni með sex liðum frá 1983 til 2009 og var þekktur fyrir harðan leikstíl og hæfni til að skara fram úr í stærstu leikjunum á leið sinni að vinna Stanley-bikarinn fjórum sinnum.

Hann var einn af ellefu leikmönnum sem hafa unnið Stanley-bikarinn með að minnsta kosti þremur mismunandi liðum. Hann var einnig þekktur sem einn af bestu leikmönnum í úrslitakeppni, en áttatíu mörk hans í úrslitakeppni á ferlinum eru þau níundu flestu í sögu NHL.

Fjölskyldan sagðist hafa gefið CTE-miðstöðinni leyfi til að deila opinberlega öllum niðurstöðum undir nafni Lemieux og bætti við að ekki ætti að draga neinar ályktanir varðandi neina greiningu.

„Claude helgaði feril sinn eftir að leikmannsferlinum lauk því að hjálpa næstu kynslóð,“ sagði fjölskyldan og vísaði til þess að Lemieux varð umboðsmaður.

„Með því að leyfa að nafn hans sé tengt þessari rannsókn vonum við að líf hans geti stuðlað að meiri skilningi, heiðarlegri umræðum og betri vernd fyrir íþróttafólk og fjölskyldur þeirra á komandi árum.“