Máttu fella úr gildi skráningu Stripa­dvis­or

Stripadvisor hefur ekki enn opnað neina þjónustu á léninu stripadvisor.is en við leit má sjá í lýsingu að síðan „veiti bestu umsagnirnar á netinu um erótíska klúbba og tengda þjónustu“. Málið snýst að miklu leyti um líkindi vörumerkisins við síðuna Tripadvisor þar sem fólk getur leitað að hótelum, veitingastöðum og afþreyingu á ferðalagi. Hægt er að skilja eftir athugasemdir um upplifun af ákveðinni ferð eða stað.

Í dómi héraðsdóms kemur fram að Stripadvisor sé einkahlutafélag og handhafi lénsins stripadvisor.is sem skráð var 18. desember 2014 í lénaskrá ISNIC. Þann 18. ágúst 2015 sótti stefnandi um skráningu vörumerkisins og vísaði til þess að um væri að ræða „Samansöfnun margvíslegra vara (þó ekki flutningur á þeim) til hagsbóta fyrir aðra, sem gerir viðskiptavinum kleift að skoða og kaupa þessar vörur á auðveldan og þægilegan hátt“.

Tripadvisor mótmælti skráningu

Í dómi kemur fram að vörumerkjaumsóknin hafi verið tekin til skráningar í janúar árið 2016 og svo birt sama ár í febrúar. Í apríl sama ár hafi Hugverkastofunni svo borist andmæli frá bandaríska fyrirtækinu Tripadvisor gegn skráningunni og vísað til þess að vörumerkin væru of lík. Vörumerki Tripadvisor nyti ríkari verndar sem heimsþekkt merki, notkun annarra gæti haft í för með sér rugling af hálfu neytenda, tengingu við þjónustu Tripadvisor LLC og rýrnun á aðgreiningareiginleikum og orðspori vörumerkis þess félags, auk þess sem skráning stefnanda væri gerð í vondri trú.

Einkaleyfastofan úrskurðaði svo árið 2017 og var skráning Stripadvisor látin halda gildi sínu og var þá ekki talið að ruglingshætta væri á vörumerkjunum tveimur. Krafa um að skráning merkisins Stripadvisor yrði felld úr gildi var því ekki tekin til greina. Áfrýjunarnefnd hugverkaréttinda staðfesti svo úrskurð Einkaleyfisstofu í júní árið 2021. Þá varð Einkaleyfisstofa orðin að Hugverkastofu.

Sóttu um alþjóðlega skráningu

Árið 2018 hafi Tripadvisor svo sótt um alþjóðlega skráningu vörumerkisins Stripadvisor og krafðist þess á sama tíma að skráning vörumerkisins yrði felld úr gildi. Hugverkastofan tilkynnti Stripadvisor um kröfuna og gaf þeim frest til að svara. Í dómi segir að engin svör hafi borist og hafi því vörumerkið verið fellt úr gildi. Stripadvisor vísaði ákvörðun Hugverkastofunnar til áfrýjunarnefndar hugverkaréttinda og gerði kröfu um að ákvörðun Hugverkastofunnar um að fella skráningu úr gildi yrði felld úr gildi.

Vísað var til þess að eigandi vörumerkisins gæti ekki sýnt fram á að hann hefði raunverulega notað vörumerkið með einhverjum vörum, markaðssetningu eða einhverju álíka. Skráning í fyrirtækjaskrá og lénaskráning væri ekki fullnægjandi. Nefndin féllst að enda á ákvörðun Hugverkastofunnar.