Hljóp heilt mara­þon­hlaup á göngum skólans síns

„Ég heiti Denas og ætla að hlaupa heilt markaþon á annarri hæð í skólanum til að styrkja Ljósið,“ sagði Denas.

Ljósið er endurhæfingar- og stuðningsmiðstöð fyrir fólk sem hefur fengið krabbamein og aðstandendur þess.

Hver hringur á skólagöngunum í Fjölbrautaskóla Suðurnesja er 140 metrar og þetta þýddi því að Denas varð að hlaupa 310 hringi til að klára maraþonhlaupið.

310 ferðir þýða samtals 43,4 kílómetra sem er meira en maraþonhlaup sem er nákvæmlega 42,195 metrar.

Strákurinn byrjaði að hlaupa klukkan 10.26 um morguninn en áður en hann fór af stað tók hann eitt glæsilegt heljarstökk úr kyrrstöðu.

Denas var búinn að hlaupa fimm kílómetra eftir 28 mínútur og þegar hann kláraði fyrstu tíu kílómetrana var hann búinn að hlaupa í fimmtíu mínútur.

Klukkan 11.33 var hann búinn að klára hundrað ferðir eða þriðjunginn af hlaupinu. Hálft maraþon var að baki klukkan 12.27 en þá var Denas búinn að hlaupa í tvo klukkutíma á göngum skólans.

Eftir þrjátíu kílómetra var þetta farið að taka verulega í. „Fæturnir mínir eru að deyja,“ sagði Denas en hélt samt áfram.

Hann kom svo í mark klukkan 13.55 og var þá búinn að vera að hlaupa á göngum skólans í þrjá og hálfan klukkutíma.

„Tíminn var 3:30,33 og þetta var allt í lagi, tímasett af NFS og stjórnendum,“ var haft eftir Denas í myndbandinu sem má sjá hér fyrir neðan.

Þar má sjá Denas klára þetta flotta styrktarhlaup sitt.