Sara tekur ekki þátt í Open og missir því af heimsleikunum

Sara hefur ekki keppt á heimsleikunum í að verða sex ár, bæði vegna alvarlegra meiðsla en einnig vegna þess að henni mistókst að tryggja sér sæti á heimsleikunum. Sara fékk aftur á móti sérstakt boð í aðra keppni.

Sara fékk nefnilega eitt af sérstökum boðum um að keppa á fyrsta viðkomustað World Fitness Project-mótaraðarinnar en það mót fer fram í London í maí.

Sara heldur áfram að reyna að koma sér aftur á keppnisgólfið eftir fjölda meiðsla og heilsufarsvandamála og sagði að upphafleg áætlun hennar fyrir 2026 hefði verið að keppa á öðrum viðkomustað mótaraðarinnar.

Hún fékk hins vegar sérstakt boð frá WFP-teyminu um að keppa á fyrsta viðkomustaðnum. Þannig að áætlun hennar núna er að halda áfram endurhæfingu hjá Jump Ship Phoenix í Arizona með það að markmiði að stíga á keppnisgólfið 1. maí í London.

Hvað varðar CrossFit Open, þá mun nafn Söru Sigmundsdóttur ekki birtast á stigatöflunni. Það er ekki vegna þess að hún vilji ekki keppa, heldur vegna þess að hún treystir þjálfara sínum og ákvað að tefla ekki framförum sínum í tvísýnu.

Ákvörðunin um að sitja hjá á Open-mótinu var þó ekki tekin fyrr en æfingin fyrir 26.1 var opinberuð. „Ef það eru mörg hopp, ef það er einhver æfing sem gæti hugsanlega sett mig aftur á bak eða hent öllu í ruslið sem ég hef lagt á mig síðustu sjö vikur, þá sagði ég bara að það yrði ákvörðun þjálfarans, því auðvitað vil ég gera allt,“ útskýrði Sara í viðtali við The Barbell Spin.

Æfing 26.1 innihélt mikið af veggboltum og hoppum yfir kassa. Svo virðist sem það hafi verið kassahoppin sem ollu mestum áhyggjum, þar sem Sara gerði breytta útgáfu af æfingunni sem innihélt samt alla veggboltana sem voru í 26.1.