Vin­konur og liðsfélagar létust á leið heim af æfingu

Hin átján ára gamla Danica Hills og besta vinkona hennar og liðsfélagi, hin sautján ára gamla Kayla Peacock, voru meðlimir íshokkíliðsins Jasper U18 Bearcats frá Alberta í Kanada.

Lögreglan segir að talið sé að ástand vegarins hafi átt þátt í árekstrinum.

Peacock ók pallbílnum og Hills var farþegi. Báðar voru úrskurðaðar látnar á staðnum að sögn kanadísku ríkislögreglunnar.

Gerðu allt saman

Í yfirlýsingu til CBC News sagði Jayden Calvert, frændi Peacock, að stúlkurnar tvær frá Hinton hefðu verið bestu vinkonur sem „gerðu allt saman“.

Unglingana dreymdi um að búa saman í Edmonton eftir útskrift úr menntaskóla í vor, sagði Calvert. Hills hafði fengið inngöngu í verkfræðideild Háskólans í Alberta og Peacock ætlaði að fara í MC College til að verða hárgreiðslukona.

Þær voru á leið heim af íshokkíæfingu og liðsmyndatöku fyrir slysið, sagði Grant Bradley, forseti Jasper Minor Sports.

Fyrir afskekkt samfélag eins og Hinton og Jasper eru ferðalög vegna íþróttarinnar nánast óumflýjanleg og Bradley sagði að slysið á mánudag hafi kveikt erfiðar umræður.

„Þetta er ekki fyrsta atvikið á þessu ári í Alberta,“ sagði hann. „Þannig að það er ein af áhyggjunum og það hefur verið rætt á vettvangi deildarinnar varðandi ferðalög.“

Slysið sem unglingarnir frá Hinton lentu í varð aðeins þremur vikum eftir að þrír íshokkíleikmenn létust í árekstri í suðurhluta Alberta á leið á liðsæfingu.

Að sögn RCMP er talið að ástand vegarins hafi verið einn af orsakaþáttum slyssins sem varð Peacock og Hills að bana.

Ferðast margra kílómetra á æfingar

„Það er ungt fólk sem ferðast marga kílómetra á sínum unga íshokkíferli og það er í hættu við að gera það,“ sagði Bradley.

Aðalminningarathöfnin fer fram í þessari viku. Bearcats munu spila sinn fyrsta leik án Peacock og Hills þann 6. mars gegn Edson Sabres.

„Þetta eru tvær mjög ungar manneskjur sem voru rétt í þann mund að leggja heiminn að fótum sér og þær fengu ekki tækifæri til þess,“ sagði Brian LaBerge, bæjarstjóri Hinton.

LaBerge lýsti unglingunum sem „skærum ljósum“ sem voru duglegar í námi og í íþróttum.

Hann lagði áherslu á þau áhrif sem harmleikurinn mun hafa á skólann þeirra í Hinton, sérstaklega kennarana en nemendur þeirra „verða [þeirra] börn“ á vissan hátt.

„Allt samfélagið syrgir“

Fánar við Harry Collinge-menntaskólann eru dregnir í hálfa stöng þessa vikuna í kjölfar slyssins sem kostaði líf tveggja nemenda í 12. bekk.

„Allt samfélagið syrgir,“ sagði Kurt Scobie skólastjóri. „Það eru engin orð sem geta að fullu lýst sorginni yfir slíkum missi.“

„Krakkarnir, þau eru að takast á við þetta betur en ég get ímyndað mér,“ sagði Bradley. „Fullorðna fólkið á sennilega erfiðara með þetta því þau eru foreldrar. Að missa barn, það er átakanlegt.“