Subterranean kemur saman í fyrsta sinn í ára­tugi

Hópurinn skipaði mikilvægan sess í íslenskri hipphoppsögu og hafði veruleg áhrif á mótun senunnar á sínum tíma.

Subterranean gaf út sína fyrstu plötu, Central Magnetizm, árið 1997 sem markaði skil í tónlistarsögu Íslands sem ein af fyrstu hiphoppútgáfum á Íslandi. Í kjölfar útgáfunnar kom lagið My style is phreaky út á safnplötunni Wide Angles sem gefin var út í London og dreift víðs vegar um heim. Listamenn á safnplötunni voru meðal annars De La Soul, Mos Def, Alice Russel, Grap Luva, Pharoeh Monch og J-Live.

Subterranean kemur fram ásamt fleirum í upphitunaratriði tónleikanna sem er í höndum samstarfsverkefnisins REW.

REW er skipað þeim Benna B-Ruff, Kjartani Trauner og Gísla Galdri og sjá þeir, ásamt fleirum, um upphitun á tónleikunum. Í tilkynningu segir að um sé að ræða samfellda sviðssyrpu þar sem hljóð og sjónræn upplifun mynda eina heild með gömlu og óséðu efni í bland við nýtt. Upphitunaratriðið á svo að leiða tónleikagesti inn í hljóðheim Mobb Deep.

Listamennirnir sem koma fram í upphitunarsyrpu REW eru:

• Emilía Hugrún
• Daron Karl
• Alexander Jarl
• Class B
• Afkvæmi Guðanna ft: Emmsjé Gauti
• Saint Pete
• Byrkir B
• Birnir
• Subterranean

Nafnið REW vísar til Rewind-takkans sem margir þekkja frá dögum kassettu- og VHS-tækja. Aðalhlutverk REW-takkans; að spóla til baka, fellur vel að samstarfsverkefni þeirra Benna B-Ruff og Kjartans Trauners en verkefnið gengur út á að vinna með hljóð- og myndheim frá gullárum „næntísins” og kafa ofan í fortíðina á sama tíma og leitast er við að búa til nýjar tengingar við nútímann. REW hefur verið í þróun í nokkur ár og hefur á þeim tíma hitað upp fyrir m.a. DJ Shadow, Talib Kweli og Pharcyde.

Miðasala fer fram á vef Stubb.