„Frekar létt að gíra sig upp gegn FH“

„Ég er virkilega glaður að klára þennan leik. Við vorum með yfirhöndina allan leikinn fannst mér og gerðum svo bara vel, vorum kaldir í lokinn og kláruðum þetta bara með stæl,“ sagði Freyr Aronsson, leikmaður Hauka, eftir sigur liðsins í kvöld.

Freyr var allt í öllu í varnarlega og sóknarlega í kvöld og kom að þrettán mörkum fyrir Hauka.

„Varnarlega mættum við mjög vel til leiks. Við fengum á okkur níu mörk í fyrri hálfleik og héldum dampi allan leikinn. Sóknarlega vorum við að fá fullt af færum og vorum stundum að klúðra en heilt yfir er ég ánægður með þennan leik.“

Haukar steinlágu á heimavelli gegn FH fyrir nákvæmlega viku síðan en það virtist ekki hafa áhrif á liðið í kvöld.

„Við áttum mikið inni eftir þann leik og við mættum bara brjálaðir í þennan leik. Það er frekar létt að gíra sig upp þegar þú ert að keppa á móti FH þannig ég er virkilega ánægður með hvernig við mættum til leiks.“