Allt að 120 prósenta hækkun verðskrár

Þetta kemur fram í tilkynningu á vef Póstsins. Þann 1. mars 2026 taki gildi verðbreytingar fyrir viðbótarþjónustu fyrir pakka innanlands, tollatengd gjöld, rúmfrek bréf og smápakka og bréf til útlanda. Nýja verðskrá má sjá hér.

Meðal mestu verðskrárhækkana er á verði pakka sem sendir eru innanlands og afhendast eingöngu skráðum viðtakanda. Verðið fer úr 275 krónum í 385 krónur, sem gerir hækkun upp á fjörutíu prósent. Af annarri viðbótarþjónustu pakka innanlands má nefna pakka sem viðtakandi greiðir burðargjald fyrir en sú þjónusta hækkar úr 300 í 400 krónur, eða um 33 prósent.

Léttustu bréfin hækka í verði

Útflutningsskýrsla hækkar um 7,8 prósent, tollskýrslugerð um 3,8 prósent og viðbótarlína í tollskýrslu um 5,9 prósent.

Sending rúmfrekra bréfa á milli núll gramma og tveggja kílóa hækkar úr 1.690 krónum í 1.940 krónur, sem gerir hækkun upp á 14,8 prósent.

Verðskrá sendinga bréfa til útlanda er að mestu óbreytt en sending léttustu bréfa hækkar í verði. Sending bréfa sem eru núll til fimmtíu grömm innan Evrópu hækkar um sléttan þriðjung og utan Evrópu um 28 prósent.

Sending bréfa á bilinu 51 til 100 grömm innan Evrópu hækkar um 34 prósent og utan Evrópu um 57 prósent.

Smápakkar til Evrópu hækka langmest

Sú þjónusta sem hækkar langmest er sending smápakka innan Evrópu. Héðan í frá verður sama verð á sendingum til allra landa innan Evrópu en áður var örlítið dýrara að senda smápakka til hinna Norðurlandanna, að því er segir á vef Póstsins.

Sending pakka á bilinu eitt til tvö kíló til annarra Evrópulanda hækkar mest eða um 120 prósent. Sending pakka á milli 501 og 1000 gramma hækkar um 100 prósent og sending pakka að 500 grömmum hækkar um 88 prósent.