Á­kváðu að spila þrátt fyrir bana­slys á leið á mótið og unnu síðan mótið

Liðið SC Lady Flyers 12AA var á leið á mót í Littleton þegar snjóruðningstæki frá samgöngustofu Colorado fór yfir miðeyjuna og lenti á rútu liðsins, að sögn umferðareftirlits Colorado. Eitt foreldri lést og nokkrir leikmenn slösuðust.

Þrátt fyrir missinn tók liðið þá ákvörðun að halda áfram að spila. Stelpurnar eru á aldrinum tíu til þrettán ára.

„Þetta var ekki auðveld ákvörðun,“ sagði Todd Stelnick, yfirþjálfari liðsins. „Stelpurnar tóku þessa ákvörðun sjálfar á fimmtudagskvöldið eftir nokkurra klukkustunda umræður um hvort þær vildu spila eða ekki, og þær vildu spila,“ sagði Stelnick.

Stelnick sagði að einn slasaður leikmaður væri kominn aftur á svellið á meðan tveir aðrir væru enn að jafna sig og gætu ekki spilað.

Vilja bara spila og hafa gaman

„Hvort sem þær vinna eða tapa, þá vilja þær bara spila og hafa gaman,“ sagði Stelnick.

Þegar Lady Flyers stigu á svellið í Edge Ice Arena mætti þeim stuðningur frá andstæðingum og áhorfendum. Leikmenn annarra liða vöfðu gulu og bláu límbandi – litum Lady Flyers – utan um kylfurnar sínar og mynduðu göng með þeim þegar Flyers skautuðu inn og út af svellinu.

Sýndu samstöðu með þeim

„Þetta var sérstakt,“ sagði Stelnick. „Að liðin lyftu kylfunum sínum og mynduðu göng þegar við komum inn og út af svellinu til að sýna samstöðu vegna þess sem gerðist,“ sagði Stelnick.

Stuðningurinn náði langt út fyrir skautahöllina og íshokkíkylfur birtust á útidyrapöllum víðs vegar um landið til marks um samstöðu.

„Ef þú ert þarna úti, settu kylfu fyrir framan dyrnar hjá þér,“ sagði Stelnick með tárin í augunum.

Allir eru að fylgjast með

Hann sagði að leikmennirnir hefðu tekið eftir því.

„Allir eru að fylgjast með. Stelpurnar eru að fylgjast með, þær elska það. Það er gott að sjá það,“ sagði Stelnick.

Jafnvel eftir tap á laugardagsmorgun héldu stuðningsyfirlýsingarnar áfram. Stelnick sagði að meðlimir Colorado 14ers-liðsins hefðu komið inn í búningsklefa Flyers til að biðja með leikmönnunum.

„Þrátt fyrir að við höfum tapað í dag kom 14ers-liðið bókstaflega inn í búningsklefann okkar og fór með bæn, sem var mjög snertandi fyrir stelpurnar,“ sagði Stelnick.

Liðið vann sig aftur inn í mótið, vann alla hina leikina og tryggði sér sæti í úrslitaleiknum þar sem liðið vann 1-0 sigur í framlengingu. Titillinn var í höfn en hugrekki og styrkur liðsins voru fyrir löngu búin að vinna svo miklu meira.