Alcaraz yngstur til að klára alslemmuna í tennisnum

Alcaraz vann Serbann Novak Djokovic í úrslitaleiknum í fjórum settum en Djokovic hafði aldrei tapað í þeim tíu úrslitaleikjum sem hann hafði áður spilað á Opna ástralska í Melbourne Park.

Alcaraz, sem er í efsta sæti heimslistans, tapaði fyrsta settinu á sunnudag þegar Djokovic byrjaði af krafti í leit sinni að sínum 25. risatitli, en hann náði að snúa leiknum sér í vil og vann leikinn 2-6, 6-2, 6-3, 7-5.

Þessi 22 ára gamli Spánverji barðist fyrir hverjum bolta og náði skotum sem venjulega hefðu verið vinningshögg hjá Djokovic og hélt uppi stöðugri pressu á þennan 38 ára gamlan keppinaut sinn.

Þegar sigurinn var í höfn, lét Alcaraz spaðann falla úr hendi sér og lagðist á bakið á völlinn með hendur fyrir höfði.

Hann lá þar í nokkrar sekúndur áður en hann fór að netinu til að takast í hendur við Djokovic. Báðir leikmenn skiptust á nokkrum orðum og Djokovic brosti þegar hann óskaði Alcaraz til hamingju. Nýi meistarinn hljóp síðan til að faðma þjálfara sína við völlinn og síðar föður sinn og aðra liðsmenn í stúkunni.

Leit Djokovic að fordæmalausum 25. risatitli í einliðaleik hefur nú verið stöðvuð af Alcaraz eða Jannik Sinner á níu risamótum og sá serbneski er ekkert að verða neitt yngri.

Djokovic sigraði Sinner naumlega í undanúrslitum og stefndi að því að verða elsti maðurinn til að vinna risatitil á Opna tímabilinu, en tókst ekki að ná því gegn Alcaraz.

Alcaraz, 22 ára og 272 daga gamall, er yngsti maðurinn til að vinna alla fjóra risatitlana í einliðaleik. Hann sló metið sem Don Budge setti á Opna franska meistaramótinu árið 1938, þegar hann var 22 ára og 363 daga gamall.

Alcaraz hefur nú unnið sjö risatitla á ferlinum, þetta var sá fyrsti í Ástralíu ásamt tveimur á Wimbledon og tveimur á Opna franska og Opna bandaríska meistaramótinu.