Segja skilið við Kringluna

Þetta staðfestir Sveinbjörg María Ingibjargardóttir, eigandi Joe Boxer, í samtali við fréttastofu. Mbl greindi fyrst frá. Hún segir að merkið sé 23 ára en þau hafi verið með verslun í Kringlunni í alls tuttugu ár.

„Við erum að halda upp á tuttugu ára afmæli, það er afmælisútsala í gangi núna,“ segir hún.

Sveinbjörg hyggst færa verslunina alfarið yfir á netið þar sem hún hefur enn ekki fengið bætur eftir að eldur kviknaði í Kringlunni í júní 2024. Joe Boxer er ekki fyrsta verslunin sem hverfur á brott en Eirberg og Macland hafa einnig horfið á brott. 

Sjá nánar: Eldsvoði í Kringlunni

„Reitir réðu eitthvað fólk upp á þak og þeir kveiktu í og við erum að sækja bætur þaðan,“ segir Sveinbjörg og tekur fram að málið sé í höndum lögfræðinga.

Joe Boxer verslunin í Kringlunni er eina sérvöruverslun merkisins í heiminum að sögn Sveinbjargar en erlendis má einungis finna hana í stórverslunum. Þau hafi leyfi til að selja vörurnar einnig í Skandínavíu sem Sveinbjörg telur að verði sitt næsta skref.

Síðasti opnunardagur verslunarinnar er laugardaginn 31. janúar. Sveinbjörg minnir þá sem eiga inneignarnótur að nýta þær fyrir þann dag.