Frakkar riðu á vaðið og tóku skuggaskip Rússa

Emmanuel Macron, forseti Frakklands, segir að skipinu hafi verið siglt frá Rússlandi undir fölskum fána og nú sé verið að sigla því til hafnar í Frakklandi í samræmi við lög.

„Við munum ekki sætta okkur við nein brot,“ skrifaði Macron. Hann segir Frakka og bandamenn þeirra staðráðna í að halda uppi alþjóðasamþykktum og tryggja að ekki sé brotið gegn refsiaðgerðum.

Skuggaflotinn svokallaði sé notaður til að fjármagna stríðsrekstur Rússa gegn Úkraínu.

Í yfirlýsingu frá stjórnvöldum í Frakklandi segir að skipinu, sem ber nafnið Grinch, hafi verið siglt frá Múrmansk í Rússlandi.

Fyrsta skipið sem Evrópuríki stöðvar á hafi

Bandaríkjamenn hafa stöðvað og lagt hald á þó nokkur skip sem talin eru tilheyra skuggaflotanum en hingað til hafa ríki Evrópu ekki gert neitt slíkt. Fregnir hafa borist af því að það hafi verið til skoðunar í Evrópu og þá meðal annars í Bretlandi.

Sjá einnig: Búa sig undir áhlaup um borð í skuggaskip

Þetta er í fyrsta sinn sem stjórnvöld í Evrópu stöðva skip með þessum hætti úti á hafi en yfirvöld á Ítalíu stöðvuðu nýverið skuggaskip sem hafði verið siglt til hafnar þar og bar farm frá Rússlandi.

Frakkar tilkynntu áhlaupið á sama tíma og Vólódímír Selenskí, forseti Úkraínu, var í pontu í Davos í Sviss að gagnrýna ríki Evrópu fyrir að stöðva ekki skuggaskip Rússa.

Stærðarinnar floti

Hundruð skipa tilheyra skuggaflotanum en þeim hefur fjölgað mjög á undanförnum árum. Flotinn er talinn hafa flutt um 3,7 milljarða tunna af olíu í fyrra eða um sex til sjö prósent af heildarmarkaði síðasta árs.

Mörg skipanna eru orðin gömul og eru slys nokkuð tíð. Þá eru mörg skipanna einnig ótryggð.

Samkvæmt alþjóðasamþykktum um skipaflutninga eiga skip að vera skráð í tilteknum ríkjum og bera fána þeirra. Skip eru þá bundin reglum og lögum þeirra ríkja þar sem þau eru skráð. Kerfið var þróað til að tryggja að flutningaskip séu tryggð og að komið sé vel fram við áhafnarmeðlimi.

Svokölluð skuggaskip notast oft við fána fátækra smáríkja og í mörgum tilfellum í skiptum fyrir greiðslur til þessara ríkja.