Haf­þór Júlíus keppir á „Steraleikunum“

Hafþór ætlar að reyna að bæta heimsmetið sitt á leikunum og það gæti skilað honum 250 þúsund Bandaríkjadölum í vasann eða tæpum 32 milljónum króna.

Hafþór staðfesti þátttöku sína með myndbandi á miðlum leikanna. „Þetta er orðið opinbert: Fjallið kemur á Enhanced Games til að bæta eigið heimsmet í réttstöðulyftu. Vertu vitni að sögulegum viðburði í Las Vegas þann 24. maí 2026,“ sagði á síðunni.

Þar kemur líka fram að Hafþór hafi nú þegar slegið 129 heimsmet á ferlinum en þar af setti hann tvö heimsmet í réttstöðulyftunni á síðasta ári.

Hafþór lyfti fyrst 505 kílóum á kraftlyftingamóti í Þýskalandi í júlí 2025 og svo aftur 510 kílóum á heimsbikarmóti í Birmingham í september 2025.

Mætir til þess að bæa heimsmetið

„Ég ætla að mæta á Enhanced Games af einni ástæðu eða til að bæta heimsmetið í réttstöðulyftu aftur. Beint frá Las Vegas 24. maí. Ég ætla að skrifa söguna aftur og láta gólfið hristast,“ sagði Hafþór Júlíus á samfélagssíðum leikanna.

Enhanced Games er íþróttaviðburður í Bandaríkjunum þar sem keppt er í mörgum ólíkum greinum en leikarnir voru stofnaðir af ástralska kaupsýslumanninum Aron D'Souza. Þetta hafa verið kallaðir Steraleikarnir þar sem íþróttafólkið fær þar leyfi til að nota frammistöðubætandi efni án þess að þurfa að gangast undir lyfjapróf.

Neikvæð viðbrögð frá íþróttaheiminum

Að sögn D'Souza stofnaði hann leikana vegna þess að hann telur að íþróttafólk eigi rétt á að gera það sem það vill við eigin líkama og að Alþjóðaólympíunefndin sé spillt fyrir að notfæra sér það.

Nokkrir fyrrverandi ólympíusundmenn hyggjast taka þátt á leikunum og nú eru íþróttamenn úr öðrum greinum að bætast í hópinn.

Viðbrögð hafa almennt verið neikvæð frá íþróttaheiminum, vísindasamfélaginu og fjölmiðlum og hafa álitsgjafar bent á öryggisáhættuna sem fylgir því að hvetja til notkunar frammistöðubætandi lyfja.