Sjálf­stæðis­flokkurinn í 35 prósentum

Vísir hefur hluta af niðurstöðum úr þjóðarpúls Gallup undir höndum en þær hafa enn ekki verið gerðar opinberar. Rúmlega tólfhundruð manns svöruðu könnuninni, sem framkvæmd var í desember.

Þar bætir Sjálfstæðisflokkurinn við sig 2,2 prósentustigum frá því í nóvember og fylgið situr því í 35,5 prósentum. Viðreisn bætir við sig 1,1 prósentustigi og situr í 9,7 prósenta fylgi. Flokkur fólksins bætir við sig prósentustigi og hefur því 5 prósenta fylgi. 

Sjá einnig: Sveitarstjórnarkosningar 2026

Fylgi Samfylkingarinnar fer niður um 3 stig og situr í 23 prósentustigum. Miðflokkurinn fer niður um 0,8 prósentustig og stendur því í 8,8 prósentum og fylgi Vinstri grænna lækkar um 0,9 prósent.

Fylgi Pírata helst óbreytt í 4,4 prósentum og fylgi sósíalista breytist heldur ekki og stendur í prósentum.

Núverandi meirihluti er því fallinn þar sem hann mælist aðeins með samtals 10 borgarfulltrúa; sex úr Samfylkingu og einn hver úr Sósíalistaflokknum, Flokki fólksins, Vinstri grænum og Pírötum.

Aftur á móti kæmust níu Sjálfstæðismenn í borgarstjórn sem gætu þá myndað hægri meirihluta með tveimur Miðflokksmönnum og tveimur Viðreisnarmönnum.

Framsókn nær ekki manni í borgarstjórn samkvæmt könnuninni. Sjálfstæðisflokkurinn nýtur mests fylgis í öllum aldurshópum, en aðeins prósentsmunur er á milli hans og Samfylkingar í yngsta aldurshópnum, 18-29 ára.

Sjálfstæðisflokkurinn heldur leiðtogaprófkjör í borginni 24. janúar og að svo stöddu hefur núverandi oddviti, Hildur Björnsdóttir, ein sagst sækjast eftir oddvitasætinu. Guðlaugur Þór Þórðarson, þingmaður og ráðherra, hefur aftur á móti verið orðaður við framboð.

Uppfært: Í eldri útgáfu fréttar kom fram að fylgi Sjálfstæðisflokksins í Reykjavík hefði ekki mælst hærra síðan fyrir hrun en það er ekki rétt, hann mældist til dæmis með 43,1 prósenta fylgi í skoðanakönnun Gallup í febrúar árið 2012. Aftur á móti hefur hann ekki fengið eins góða kosningu síðan fyrir hrun, það mesta árið 2010 (33,61 prósent atkvæða).